पाल्पामा सञ्चालन भइरहेको ‘पाल्पा च्याम्पियन्स ट्रफी’ जिल्लास्तरीय क्रिकेट लिग प्रतियोगिताको फाइनलमा करुवा क्रिकेट क्लब र पाल्पाली क्रिकेट प्लेयर्सबीच प्रतिस्पर्धा हुने भएको छ ।
पाल्पा — पाल्पामा सञ्चालन भइरहेको ‘पाल्पा च्याम्पियन्स ट्रफी’ जिल्लास्तरीय क्रिकेट लिग प्रतियोगिताको फाइनलमा करुवा क्रिकेट क्लब र पाल्पाली क्रिकेट प्लेयर्सबीच प्रतिस्पर्धा हुने भएको छ । बिहीबार भएका दुई खेलसँगै प्रतियोगिताको फाइनलमा पुग्ने दुवै टोलीको टुंगो लागेको हो ।
जिल्ला क्रिकेट संघ, पाल्पा र दमकडा क्रिकेट क्लबको आयोजनामा सञ्चालन भइरहेको प्रतियोगितामा जिल्लाका ६ वटा टोली सहभागी भएका थिए । लिग चरणमा सहभागी टोलीले खेलेका खेलका आधारमा अंक प्राप्त गरेका थिए । त्यही अंकका आधारमा करुवा क्रिकेट क्लब र पाल्पाली क्रिकेट प्लेयर्सले फाइनलमा स्थान पक्का गरेका हुन् ।
लिग चरणका खेलबाट करुवा क्रिकेट क्लबले ३.६२ अंक प्राप्त गरेको छ । त्यस्तै, पाल्पाली क्रिकेट प्लेयर्सले १.९८ अंक बटुलेको छ । अंकका आधारमा अगाडि रहेका यी दुई टोली उपाधिका लागि आमनेसामने हुने भएका हुन् । दुवै टोलीले प्रतियोगिताभर राम्रो प्रदर्शन गर्दै फाइनलसम्मको यात्रा तय गरेका छन् ।
दमकडा खेलमैदानमा शुक्रबार हुने फाइनल खेलमा दुवै टोलीको लक्ष्य उपाधि जित्ने हुनेछ । जिल्लाका विभिन्न टोलीबीच प्रतिस्पर्धा गराउँदै क्रिकेट खेलको विकास र खेलाडीको क्षमता अभिवृद्धि गर्ने उद्देश्यले प्रतियोगिता आयोजना गरिएको हो । फाइनल खेलमा उपाधिका लागि प्रतिस्पर्धा हुने भएकाले खेल रोमाञ्चक हुने अपेक्षा गरिएको जिल्ला क्रिकेट संघका उपाध्यक्ष शैलेन्द्र भट्टराईले बताए ।
प्रतियोगिताको विजेता टोलीले पाल्पा च्याम्पियन्स ट्रफीसहित ७५ हजार रुपैयाँ नगद पुरस्कार र प्रमाणपत्र प्राप्त गर्नेछ । त्यस्तै, दोस्रो हुने टोलीले ४० हजार रुपैयाँ नगद, ट्रफी, मेडल र प्रमाणपत्र पाउनेछ । जिल्लास्तरमा क्रिकेट खेलिरहेका खेलाडीलाई प्रोत्साहन गर्न र उनीहरूको प्रतिभा उजागर गर्न पुरस्कारको व्यवस्था गरिएको आयोजक दमकडा क्रिकेट क्लबले जनाएको छ ।
प्रतियोगितामा टिमको प्रदर्शनका आधारमा उत्कृष्ट खेलाडीलाई पनि पुरस्कृत गरिनेछ । प्रतियोगिताभर उत्कृष्ट बलर र उत्कृष्ट ब्याट्सम्यानलाई जनही ५ हजार रुपैयाँ प्रदान गरिनेछ । त्यसैगरी, प्रतियोगिताको उत्कृष्ट खेलाडी अर्थात् प्लेयर अफ द सिरिजलाई ७ हजार रुपैयाँ र उदाउँदो खेलाडीलाई ३ हजार रुपैयाँ नगद पुरस्कार प्रदान गरिने दमकडा क्रिकेट क्लबका अध्यक्ष छवि भट्टराईले जानकारी दिए ।
जिल्ला क्रिकेट संघ, पाल्पाका अध्यक्ष पूर्णराज शाक्यले प्रतियोगिताको विजेता र उपविजेता टोलीलाई नगद पुरस्कारसहित ट्रफी तथा प्रमाणपत्र प्रदान गरिने बताए । प्रतियोगिताले पाल्पाका क्रिकेट खेलाडीलाई आफ्नो क्षमता प्रदर्शन गर्ने अवसर प्रदान गर्नुका साथै जिल्लामा क्रिकेटप्रतिको आकर्षण बढाउन सहयोग पुग्ने अपेक्षा गरिएको छ । जिल्लाका ६ टोली सहभागी प्रतियोगितामा दमकडा क्रिकेट क्लब, असेर्दी क्रिकेट क्लब, हुँगीका साथै फ्रेन्ड्स ब्वाइज क्रिकेट क्लब र न्यू मणिमुकुन्द क्रिकेट क्लबको समेत सहभागिता रहेको थियो ।
माधव अर्याल कान्तिपुरका पाल्पा संवाददाता हुन् ।
