रास्वपा अनुशासन आयोगका उपप्रमुख हरिचन्द्र भट्टराईले कान्तिपुरसँगको कुराकानीमा चारित्रिकदेखि विभिन्न विषय आएको र आम नागरिकको चासो रहेकाले अनुसन्धान अघि बढाइएको बताए ।
काठमाडौँ — एक महिलासँगको अश्लील र आपत्तिजनक अडियो बाहिरिएपछि रास्वपा सांसद खगेन्द्र सुनार विवादमा तानिएका छन् । त्यो अडियोमा सुनारकै आवाज रहेको दाबी गरिएको छ। तर यसको अनुसन्धानपछि पुष्टि हुन बाँकी छ।
रास्वपा महामन्त्री विपिनकुमार आचार्यले मंगलबार विज्ञप्ति जारी गर्दै सांसद सुनारमाथि लागेका आरोप निकै गम्भीर र संवेदनशील भएको बताएका छन् । यस विषयमा सत्यतथ्य पत्ता लगाउन पार्टीको केन्द्रीय अनुशासन आयोगलाई तत्काल आन्तरिक छानबिन प्रक्रिया अगाडि बढाउन निर्देशन दिइसकिएको पनि उनले बताएका छन् ।
यसै सन्दर्भमा रास्वपा अनुशासन आयोगका उपप्रमुख हरिचन्द्र भट्टराई सँग कान्तिपुरका दशरथ राईले गरेको संक्षिप्त कुराकानी :
रास्वपाका सांसद खगेन्द्र सुनारको विवादित अडियो सार्वजनिक भएको छ । यसबारे तपाईं के भन्नुहुन्छ ?
हामीले पनि सामाजिक सञ्जाल र मिडियामा आएपछि थाहा पाएका हौं । अहिले प्रारम्भिक छानबिन सुरु भइसकेको छ । तर, यो विषय निकै गम्भीर छ भनेर बुझ्दा हुन्छ ।
छानबिनका क्रममा उहाँसँग सम्पर्क भयो ?
अनुशासन आयोगको आफ्नै प्रक्रिया, नियमावली, विधान र आचारसंहिता छन् । तिनका आधारमा छानबिन सुरु भइसकेको छ । अनुसन्धान प्रक्रियागत हुने भएकाले उहाँको पनि प्रतिक्रिया लिन्छौं । अहिले यी विषयलाई गम्भीरतापूर्वक लिएकाले नै छानबिन सुरु गरिसकेका छौं । उहाँ कति छिटो सम्पर्कमा आउनुहुन्छ, त्यसअनुसार पनि निष्कर्षको समय निर्धारण हुन्छ ।
चारित्रिक कुरादेखि विभिन्न विषय आएका छन् । यसलाई हामीले अति संवेदनशील रूपमा हेरेका छौं । एउटा लोकतान्त्रिक पार्टीले यसलाई गम्भीरतापूर्वक लिनैपर्यो नि । आम नागरिकको चासो छ । सामाजिक सञ्जालमा के-कसो हो भन्ने चर्चा छ । हामी रातदिन नभनी अनुसन्धानमा लाग्छौं ।
दशरथ राई कान्तिपुर टेलिभिजनका संवाददाता हुन् ।
