टस जितेर पहिले ब्याटिङ गरेको काठमाडौं गोर्खाज १९.३ ओभरमा अलआउट हुँदा भीम सार्कीले सर्वाधिक ३३ रन बनाए।
काठमाडौँ — तीब्र बलर राहुल यादवले चार विकेट लिएपछि जनकपुर बोल्ट्सले नेपाल प्रिमियर लिग क्रिकेटमा बिहीबार काठमान्डु गोर्खाजलाई १ सय १५ रनमा रोकेको छ । टस जितेर ब्याटिङ रोजेको काठमान्डु १९.३ ओभरमै अलआउट भयो ।
काठमान्डुबाट भीम सार्कीले सर्वाधिक ३३ रन बनाए । उनले २९ बल खेली ४ चौका प्रहार गरे । उनी ललित राजवंशीको बलमा स्टम्प आउट भए ।
काठमान्डुबाट साम हेजलेट १, हरिशंकर ९ र स्मित पटेल १३ रन बनाएर आउट भए । जनकपुरले ट्यालेन्ट हन्टबाट ल्याएका राहुलले काठमाडौंका दुबै ओपनर हेजलेट र पटेललाई आउट गरेका थिए । उनलेपछि लगातार बलमा काठमाडौंका कप्तान करण केसी र मोहम्मद आदिल आलम आउट गरे ।
उनले ४ ओभरमा ३१ रन खर्चेर ४ विकेट लिए । राहुलले उत्कृष्ट रनिङ क्याच लिदैं जहाॅन्दद खानलाई ५ रनमा पेभेलियन फर्काएका थिए । रशिद खानले १४ बल खेली २ चौकासहित १७ रन बनाए । सुमित महर्जन १०, करण ८ रन बनाई आउट भए । सुमित रन आउट भए ।
राहुलबाट जनकपुरबाट सैफ हसनले ४ ओभरमा ११ रन खर्चेर २ तथा कप्तान हरमित सिंह, ललित र मोइन अलीले १–१ विकेट लिए ।
सुयान्शु कोइराल र प्रसिद्ध जैसी नेपालको यू–१९ टोलीको बन्द प्रशिक्षणमा परेपछि गोर्खाजले उनीहरुको स्थानमा सुमित महर्जन र हरिशंकर साहलाई खेलाएको हो ।
व्यक्तिगत कारण जिम्मी निसम नखेलेको कप्तान हरमितले टसका क्रममा बताएका थिए । उनको स्थानमा जनकपुरले बंगलादेशका ओपनर सैफ हैसनलाई प्लेयिङमा खेलाएको थियो । उनी बुधबार मात्र नेपाल आइपुगेका हुन् ।
