चाडपर्वलक्षित नयाँ गाडी तथा मदिराको आयात बढ्दा त्यसको सिधा सकारात्मक प्रभाव भन्सारको राजस्व खातामा देखिएको हो ।
काठमाडौँ — देशकै प्रमुख व्यापारिक नाकामा रहेको वीरगन्ज भन्सार कार्यालयले चालु आर्थिक वर्षको असोज महिनाका लागि निर्धारण गरिएको राजस्व संकलनको लक्ष्य हासिल गरेको छ ।
वीरगन्ज भन्सार कार्यालयको तथ्यांकअनुसार असोज महिनाका लागि २६ अर्ब ४६ करोड रुपैयाँ राजस्व उठाउने लक्ष्य राखिएकोमा २६ अर्ब ७२ करोड ५८ लाख रुपैयाँ राजस्व संकलन भएको छ ।
प्रमुख भन्सार प्रशासक कृष्णप्रसाद मैनालीले यो महिनाको कुल लक्ष्यको १०१ प्रतिशत प्रगति हासिल भएको जानकारी दिए । नेपालीहरूको महान् चाडपर्व (दसैँ, तिहार तथा छठ) का समयमा बजारमा वस्तुको माग बढेसँगै आयातमा भएको वृद्धि र भन्सार जाँचपासमा गरिएको विशेष सहजीकरणका कारण राजस्व संकलनमा सकारात्मक सुधार देखिएको उनको भनाइ छ ।
चालु आर्थिक वर्षका लागि भन्सार विभागले देशभरका भन्सार कार्यालयहरूबाट कुल ६ खर्ब २८ अर्ब रुपैयाँ राजस्व संकलन गर्ने लक्ष्य राखेको छ । यसमध्ये वीरगन्ज भन्सार कार्यालयलाई वार्षिक २ खर्ब ९४ अर्ब रुपैयाँ राजस्व संकलनको जिम्मेवारी दिइएको छ । जुन भन्सार विभागको कुल देशव्यापी लक्ष्यको ४६ दशमलव ८२ प्रतिशत हुन आउँछ ।
चालु आर्थिक वर्षको असोज महिनासम्म आइपुग्दा वीरगन्ज भन्सारले आफ्नो लक्ष्यअनुसार राजस्व संकलन गर्दै गएको छ । भन्सार विभागको देशव्यापी कुल वार्षिक लक्ष्यमा वीरगन्ज भन्सारले असोज मसान्तसम्ममा मात्रै ११ दशमलव ०१ प्रतिशत योगदान पुर्याइसकेको छ ।
वीरगन्ज भन्सारको राजस्व असुलीमा सधैँझैँ केही निश्चित वस्तुको आयातले मुख्य भूमिका खेलेको छ । भन्सार कार्यालयका अनुसार यस नाकाबाट हुने राजस्व संकलनमा सबैभन्दा बढी योगदान पुर्याउने वस्तुहरूमा इन्धन, नयाँ सवारीसाधन, फलाम तथा फलामजन्य सामग्री, मदिरा र औद्योगिक कच्चा पदार्थ रहेका छन् ।
चाडपर्वलक्षित नयाँ गाडी तथा मदिराको आयात बढ्दा त्यसको सीधा सकारात्मक प्रभाव भन्सारको राजस्व खातामा देखिएको हो ।
शंकर आचार्य कान्तिपुरका पर्सा संवाददाता हुन् ।
