सम्झौताअनुसार एनपीएलको तेस्रो संस्करणमा काठमान्डु गोर्खाजको मस्कटको पछाडि वेद इन्टरनेसनल एजुकेसनको लोगो राखिनेछ, जसले सहकार्यलाई चिनाउनेछ।
काठमाडौँ — काठमान्डु गोर्खाज र वेद इन्टरनेसनल एजुकेसन कन्सल्टेन्सीबीच नेपाल प्रिमियर लिग (एनपीएल) क्रिकेटको तेस्रो संस्करणका लागि सहकार्य भएको छ । सम्झौताअनुरूप एनपीएलको फ्रेन्चाइज टोली काठमान्डु गोर्खाजले मस्कटको पछाडि वेद इन्टरनेसनल एजुकेसनको लोगो राख्ने छ ।
दुवै पक्षबीच सोल्टीमोडस्थित होटल इम्पेरियलमा आयोजित कार्यक्रममा काठमान्डु गोर्खाज र वेद इन्टरनेसनल एजुकेसनबीच सम्झौता भएको हो । सम्झौतामा काठमान्डु गोर्खाजका कार्यकारी निर्देशक अनुभव सिरोहिया र वेद इन्टरनेसनल एजुकेसनका प्रमुख कार्यकारी अधिकृत तथा नेपाल शैक्षिक परामर्श संघ (इक्यान) का सचिव आशिक कार्कीले हस्ताक्षर गरेका छन् ।
गोर्खाजका कार्यकारी निर्देशक सिरोहियाले टोलीमाथि विश्वास गर्दै सहकार्यका लागि अघि आएकोमा वेद इन्टरनेसनलप्रति आभार व्यक्त गर्दै खेलकुदको विकासमा निजी क्षेत्रको सहभागिता र सहयोग महत्त्वपूर्ण हुने उल्लेख गरे । उनले यस्तो सहकार्यले टोलीलाई थप हौसला र प्रेरणा प्रदान गर्ने जनाए ।
वेद इन्टरनेसनल एजुकेसनका प्रमुख कार्यकारी कार्कीले नेपाली क्रिकेटप्रतिको आफ्नो विशेष रुचि र लगावका कारण काठमान्डु गोर्खाजसँग सहकार्य गर्न पाउँदा खुसी लागेको बताए ।
उनले नेपाली क्रिकेटको विकास र प्रवर्द्धनमा निजी क्षेत्रले पनि आआफ्नो तर्फबाट योगदान दिनुपर्ने धारणा राखे । कार्कीले गोर्खाजसँगको सहकार्यलाई एउटा टोलीसँग जोडिने विषयमा मात्र सीमित नराखी नेपाली क्रिकेटप्रतिको समर्थन र खेलकुदको विकासमा योगदान पुर्याउने प्रयासका रूपमा लिएको बताए ।
.png)
