पोखराले प्रतियोगितामा पहिलो खेल खेल्दैछ भने सुदूरपश्चिम पहिलो खेलमा लुम्बिनी लायन्ससँग सात विकेटले पराजित भएको थियो।
काठमाडौँ — नेपाल प्रिमियर लिग क्रिकेटमा बुधबार पोखरा एभेन्जर्स र सुदूरपश्चिम रोयल्सबीच प्रतिस्पर्धा हुँदै छ । प्रतियोगितामा पोखराको यो पहिलो खेल हो भने सुदूरपश्चिम पहिलो खेलमा च्याम्पियन लुम्बिनी लायन्ससँग ७ विकेटले पराजित भएको थियो ।
सुदूरपश्चिम पछिल्ला दुवै संस्करणको फाइनलमा पुगे पनि उपाधि जित्न सकेको छैन । पोखरा भने एनपीएलका दुवै संस्करणमा प्लेअफमा पुग्न नसक्ने एकमात्र टोली हो ।
कुशल भुर्तेलको कप्तानीमा रहेको पोखराबाट पूर्वविश्व नम्बर एक अलराउन्डर सकिब अल हसनसहित अर्का दुई बंगलादेशी खेलाडी मोहम्मद सैफुद्दिन, मेहदी हसन तथा श्रीलंकाका धनञ्जय लक्षण, चामिका करुणारत्ने विदेशी खेलाडीका रूपमा रहेका छन् ।
बुधबारमात्र पोखराले श्रीलंकाका विकेटकिपर ब्याटर सदिरा समरारत्नायकेलाई अनुबन्धित गरेको जनाएको थियो ।
सुदूरपश्चिम सोमबार पहिलो दिनको खेलमा ८७ रनमा अलआउट भएको थियो । दीपेन्द्रसिंह ऐरीको कप्तानीमा रहेको सुदूरपश्चिममा नेपाली राष्ट्रिय टोलीबाट खेलिसकेका ब्याटरहरू विनोद भण्डारी, आसिफ शेख, इशान भण्डारी रहेका छन् ।
टोलीका विदेशी खेलाडीमा इंग्लिस सैफ जैब, वेस्ट इन्डिजका सेरफन रदरफोर्ड, स्कटल्यान्डका ब्रान्डन म्याकमुलन र न्युजिल्यान्डका स्कट कुग्लेन रहेका छन् ।
सुदूरपश्चिमले बुधबारमात्र थरिन्दु रत्नायकेलाई भित्र्याएको घोषणा गरेको छ ।
विनोद पाण्डे कान्तिपुरका खेलकुद ब्यूरो प्रमुख हुन् ।
.png)
