जाल्पा माविले त्रिवेणी नगरपालिकालाई ३–० का सेटमा पराजित गर्यो ।
बाजुरा — बडिमालिका कप खुला भलिबल प्रतियोगिताको उपाधि जाल्पा माध्यमिक विद्यालयले जितेको छ भने त्रिवेणी नगरपालिका उपविजेता बनेको छ ।
मंगलबार सम्पन्न प्रथम बडिमालिका कप खुला प्रतियोगितामा जाल्पा मावि पिनालेखले त्रिवेणी नगरपालिकालाई सोझो सेटमा पराजित गरेको हो ।
बडीमालिका नेचर प्रालि बाजुराको आयोजनामा सुरु भएको खुला भलिबल प्रतियोगितामा ८ टिम सहभागी भएका थिए । लिग चरण, क्वाटरफाइनल र सेमिफाइनल जित्दै उपाधिका लागि प्रतिस्पर्धा गरेको जाल्पा माविले त्रिवेणी नगरपालिकालाई ३–० का सेटमा पराजित गरेको अध्यक्ष कृष्ण ओलीले बताए ।
उनका अनुसार जाल्पा माविले पहिलो सेटमा २५–२३, दोस्रो सेटमा २५–१९ र तेस्रो सेटमा २५–१६ को स्कोरमा त्रिवेणी नगरपालिकालाई पराजित गरेको हो ।
उपाधि विजेता जाल्पा माविले नगद एक लाख ५५ हजार ५५५ सहित ट्रफी जितेको प्रालिका अध्यक्ष ओलीले कान्तिपुरलाई जानकारी दिएका छन् ।
यस्तै, उपविजेता बनेको त्रिवेणी नगरपालिकाले ९९ हजार ९९९ रुपैयाँसहित ट्रफी जितेको हो ।
खेलकुदलाई प्रतिस्पर्धा र मनोरञ्जनमा मात्र सीमित नराखी प्रकृति संरक्षण, वातावरणीय चेतना, पर्यटन प्रवर्द्धन तथा स्थानीय सम्भावनाको उजागर गर्ने माध्यमका रूपमा विकास गर्ने उद्देश्यले प्रतियोगिता आयोजना गरिएको प्रालिका कार्यकारी निर्देशक गणेश थापाले बताए ।
आगामी वर्ष प्रालिले दुई लाख रुपैयाँको खुला भलिबल प्रतियोगिता आयोजना गर्ने घोषणा गरेको छ ।
यस्तै जिल्लाबाट, प्रदेश तथा राष्ट्रियस्तरमा भलिबल क्षेत्रमा महत्त्वपूर्ण योगदान पुर्याउने दुई जनालाई प्रालिले सम्मान गरेको छ । पूर्वभलिबल खेलाडी तथा बाजुरा भलिबल संघका अध्यक्ष सुरेन्द्र रौले र भलिबल खेलाडी बलबहादुर रोकायालाई दोसल्लासहित सम्मान गरिएको हो ।
