मेलामा गोदावरी फूलका ४५० भन्दा बढी प्रजातिका बिरुवा तथा अन्य मौसमी फूलको प्रदर्शन र बिक्री गरिनेछ ।
काठमाडौँ — फ्लोरिकल्चर एसोसिएसन नेपाल (फ्यान) को आयोजनामा कात्तिक १२ देखि १६ सम्म ललितपुरको जावलाखेल खेल मैदानमा १९ औं गोदावरी फूलको प्रतियोगितात्मक प्रदर्शनी २०८३ हुने भएको छ ।
'रोपेर फूल गोदावरी, सजाऔं घरआँगन वरिपरि' भन्ने नाराका साथ हुने मेलाको उद्घाटन बागमती प्रदेशका कृषि, पशुपन्छी, वन तथा वातावरणमन्त्री रमा आले मगरले गर्नेछिन् । तिहार र छठ पर्वलाई लक्षित गरी आयोजना गरिएको मेलामा ८६ वटा प्रदर्शनी कक्ष रहनेछन् ।
मेलामा गोदावरी फूलका ४५० भन्दा बढी प्रजातिका बिरुवा तथा अन्य मौसमी फूलको प्रदर्शन र बिक्री गरिनेछ । गोदावरी फूलका ५ प्रजाति (मिनिएचर, स्पाइडर, रिफ्लेक्स, इन्कर्भ र कट फ्लावर) बीच प्रतिस्पर्धा गराइने र उत्कृष्टलाई पुरस्कृत गरिनेछ।
पाँच दिनसम्म चल्ने मेलामा ३९ हजारभन्दा बढी दर्शकले अवलोकन गर्ने र १ करोड ३० लाख रूपैयाँभन्दा बढीको कारोबार हुने अपेक्षा गरिएको छ । नेपालमा पुष्प व्यवसायको माग र आपूर्तिमा वार्षिक वृद्धि भए पनि आयात अझै उच्च रहेको आयोजकले जनाएको छ ।
