प्रदेश प्रमुखको कार्यालयका अनुसार खापुङले उनको राजीनामा कात्तिक १६ देखि लागू हुने गरी स्वीकृत गरेका छन् ।
विराटनगर — कोशी प्रदेश लोक सेवा आयोगका अध्यक्ष महेन्द्रप्रसाद गुरागाईंले राजीनामा दिएका छन्। आर्थिक तथा पदीय अनियमितता र स्वार्थको द्वन्द्वसम्बन्धी गम्भीर आरोप लागेपछि पूर्वसचिव गुरागाईंले मंगलबार प्रदेश प्रमुख परशुराम खापुङसमक्ष लिखित राजीनामा पेस गरेका थिए।
प्रदेश प्रमुखको कार्यालयका अनुसार खापुङले उनको राजीनामा कात्तिक १६ देखि लागू हुने गरी स्वीकृत गरेका छन् । प्रदेश लोक सेवा आयोग ऐन, २०७६ को दफा ३ को उपदफा (९) को खण्ड (क) बमोजिम प्रदेश प्रमुखले उनको राजीनामा स्वीकृत गरेका हुन्।
गुरागाईं २०८१ असार २३ गते आयोगको अध्यक्षमा नियुक्त भएका थिए। उनको पदावधि ६ वर्षको थियो। पदावदी अझै चार वर्ष बाँकी थियो।
पर्वत पोर्तेल कान्तिपुर मिडिया ग्रुपका कोशी प्रदेश संवाददाता हुन् । उनी झापा र विराटनगर क्षेत्रबाट लेख्छन् ।
