महिला भलिबलतर्फ स्टेप रामपुर पाल्पाले बाङ्लाङ महिला भलिबल क्लब निस्दीलाई २–० सेटले पराजित गर्दै उपाधि जित्यो । निस्दी भलिबल क्लब तेस्रो भयो ।
पाल्पा — पाल्पाको निस्दी गाउँपालिका–५, गल्धाको बेलौजीमा सम्पन्न पाँचौं निस्दी कप खुला भलिबल प्रतियोगिताको उपाधि रुपन्देहीको न्यू होराइजन क्लबले जितेको छ । फाइनलमा जिल्ला भलिबल संघ पाल्पालाई ३–१ सेटले पराजित गर्दै न्यू होराइजनले उपाधि जितेको हो । उपाधिसँगै न्यू होराइजनले १ लाख १ हजार १११ रुपैयाँ, सिल्ड, मेडल र प्रमाणपत्र प्राप्त गरेको छ । उपविजेता पाल्पाले ५० हजार १११ रुपैयाँ पुरस्कार पायो ।
कपिलवस्तुको बाणगंगा भलिबल ट्रेनिङ सेन्टरलाई ३–२ सेटले पराजित गर्दै पाल्पाको बाङ्लाङ भलिबल क्लब तेस्रो भयो । उसले २५ हजार १११ रुपैयाँ पुरस्कार प्राप्त गरेको खेल संयोजक यम सारुले बताए ।
महिला भलिबलतर्फ स्टेप रामपुर पाल्पाले बाङ्लाङ महिला भलिबल क्लब निस्दीलाई २–० सेटले पराजित गर्दै उपाधि जित्यो । निस्दी भलिबल क्लब तेस्रो भयो । महिलातर्फ प्रथम, द्वितीय र तृतीय हुने टोलीले क्रमशः १५ हजार, १० हजार र ५ हजार रुपैयाँसहित मेडल, ट्रफी र प्रमाणपत्र प्राप्त गरे ।
पुरुषतर्फ न्यू होराइजनका प्रदीपकुमार चौधरी उत्कृष्ट खेलाडी घोषित भए । महिलातर्फ स्टेप रामपुरकी विनिता राना उत्कृष्ट खेलाडी बनिन् । प्रतियोगिताका विजेतालाई प्रतिनिधिसभा सदस्य सन्दीप रानाले पुरस्कार प्रदान गरे ।
गल्धाको बेलौजीस्थित जनचेतना युवा क्लबको आयोजना तथा बालकल्याण क्लबको सहआयोजनामा प्रतियोगिता सम्पन्न भएको हो ।
माधव अर्याल कान्तिपुरका पाल्पा संवाददाता हुन् ।
