पोस्ट म्याच कन्फ्रेन्समा उल–हकले भने, ‘प्रतियोगिताकै पहिलो खेलमा यस्तो प्रदर्शन कहिलेकाहीँ हुन सक्छ । आज हाम्रो प्रदर्शन वास्तवमै फिक्का रह्यो । यसलाई खराब सुरुआत मान्नैपर्छ । हाम्रा ब्याटरले राम्रो सट खेलेनन् । अब भविष्यमा राम्रो प्रदर्शन आवश्यक हुन्छ ।’
काठमाडौँ — सुदूरपश्चिम रोयल्सका प्रशिक्षक मिसबह उल–हकले नेपाल प्रिमियर लिग (एनपीएल) तेस्रो सिजनको पहिलो खेलमा आफ्नो टिमको प्रदर्शन निकै फितलो रहेको स्विकारेका छन् । पाकिस्तानी क्रिकेटका लिजेन्ड उल–हकले अबका खेलमा आफ्नो टिमको प्रदर्शन अनुशासित हुनुपर्ने माने ।
प्रतियोगिताको सोमबार भएको उद्घाटन खेलमा सुदूरपश्चिम डिफेन्डिङ च्याम्पियन लुम्बिनी लायन्सको हातबाट सजिलै सात विकेटले पराजित भएको थियो । दुई पल्टको उप–विजेता सुदूरपश्चिम गत सिजनको फाइनलमा लुम्बिनीसँग नै पराजित भएको थियो ।
पोस्ट म्याच कन्फ्रेन्समा उल–हकले भने, ‘प्रतियोगिताकै पहिलो खेलमा यस्तो प्रदर्शन कहिलेकाहीँ हुन सक्छ । आज हाम्रो प्रदर्शन वास्तवमै फिक्का रह्यो । यसलाई खराब सुरुआत मान्नैपर्छ । हाम्रा ब्याटरले राम्रो सट खेलेनन् । अब भविष्यमा राम्रो प्रदर्शन आवश्यक हुन्छ ।’
उनले पिच केही सुस्त रहेको हुनाले यस्तोमा साझेदारी आवश्यक हुने, तर आफ्ना खेलाडीले त्यसै अनुसारको प्रदर्शन गर्न नसकेको बताए । पहिले ब्याटिङ गरेको सुदूरपश्चिम ८७ रन मात्र बनाएर अलआउट भएको थियो र यसक्रममा उसले नियमित अन्तरमा विकेट गुमाएको थियो ।
विजयी टिमका खेलाडी किशोर महतोले यो जितलाई स्वपनिल सुरुआत भएको माने । उनले भने, ‘आज पिचको व्यवहार केही सुस्त थियो । तर हामीले राम्रो गर्न सक्यौ भने हुन्छ । यसलाई हामीले आफूले चिताएको खेल जस्तै भन्न मिल्छ । यो राम्रो सुरुआत हो ।’
.png)
