गुलरियाबाहेक जिल्लाका सबै ८ छोटी भन्सार कार्यालय बन्द

माओवादी द्वन्द्वकालमै बन्द भएका ७ वटा भन्सार नखुल्दै र गत १ साउनदेखि ताराताल छोटी भन्सार पनि बन्द भएको हो ।

बर्दिया — गत १ साउनदेखि तारातालस्थित छोटी भन्सार कार्यालय पनि बन्द भएको छ । योसँगै गुलरियाबाहेक बर्दियाका सबै ७ वटा छोटी भन्सार बन्द हुँदा राजश्व संकलन प्रभावित भएको छ ।

माओवादी द्वन्द्वकालमै बन्द भएका ७ वटा भन्सार नखुल्दै र गत १ साउनदेखि ताराताल छोटी भन्सार पनि बन्द भएको हो । ८ वटा छोटी भन्सार कार्यालय बन्द भएकोले यस नाकाबाट आयात निर्यात हुने सामानको राजश्व संकलन शून्य भएको छ । भन्सार कार्यालय, राजापुरकी प्रमुख अनिता पौडेलले छोटी भन्सार कार्यालय बन्द भएका कारण राजश्व संकलन प्रभावित बन्दै गएको बताइन् । जिल्लाको पडेरिया, गणेशपुर, कालाबन्न्जर, छेदापुर, धनौरा, कोठियाघाट र ईश्वरीगन्ज नाकामा रहेका छोटी भन्सार कार्यालय सशस्त्र द्वन्द्व कालमा अन्यत्र स्थान्तरण भएपछि बन्द छन् । गत असारसम्म सञ्चालनमा रहेको ताराताल छोटी भन्सार पनि बन्द भएको छ । सदरमुकाम गुलरियामा छोटी र मूल भन्सार राजापुरमा मात्र सञ्चालनमा छन् ।

बन्द गरिएको यस नाकामा दैनिक लाखौं रुपैयाँको दैनिक उपभोग्यका खाद्यान्यलगायत कपडाको राजश्व उठ्न सकेको छैन । जिल्लासँग ८३ किलोमिटर सीमाना भारतसँग जोडिएको छ । करिब ९० प्रतिशत सिमाना भारतीय घना जंगलले ढाकेको हुँदा यसको फाइदा उठाई तस्करले चोरी निकासी पैठारी गर्दै आएका छन् । सशस्त्र प्रहरी बल र नेपाल प्रहरी मुख्य नाकामा तैनाथ हुनाका साथै नियमित गस्ती भने हुने गरेको छ । सुरक्षा निकाय नभएको ठाउँबाट मौकाको फाइदा उठाइ तस्करी हुने गरेको भन्सारका कर्मचारीहरू बताउँछन् । कर्मचारीसँग जनशक्ति नभएका कारण राजश्वमा ठुलो असर पुगेको भन्सारका कर्मचारीले गुनासो पोखेका छन् ।

भारतबाट हुने चोरी तस्करीका सामान सशस्त्र प्रहरी बलले सबैभन्दा बढी बरामद गरी भन्सार कार्यालयमा बुझाउँदा वार्षिक लक्ष्य पूरा हुँदै आएको भन्सार प्रमुख पौडेलले बताइन । उनले भनिन्, ‘त्यसपछि नेपाल प्रहरी र भन्सार कार्यालयबाट राजश्व संकलन हुने गरेको छ । चालु आर्थिक वर्षमा यस भन्सारको वार्षिक लक्ष्य ३ करोड ३६ लाख रहेको छ । गत साउनयता सशस्त्र प्रहरी बलले १ करोड ६ लाख ५९ हजार बराबरको चोरी तस्करीका सामान बरामद गरी बुझाएको भन्सारका सूचना अधिकारी प्रमोदकुमार महतोले बताए । उनका अनुसार सोही अवधिमा नेपाल प्रहरीले तस्करीका सामान ३३ लाख २३ हजार र भन्सार कार्यालयले ३ लाख ४४ हजार राजश्व असुली भएको छ ।

छोटी भन्सार कार्यालय, तारातालले गत आवमा ३३ लाख राजश्व असुली भएको थियो । वैधरुपमा यस नाकाबाट आउने सामानको राजश्व उठ्न बन्द भएको छ । सुरक्षा निकायले तस्करीका सामान बरामद गरी भन्सार बुझाएपछि लिलाम गरी राजश्व संकलन हुने गर्छ ।

भन्सार कार्यालय, बर्दियामा कर्मचारीको दरबन्दीअनुसार जनशक्ति कम छ । हाल भन्सार अधिकृत १, नासु ६ मध्ये ४, लेखापाल १, चालक १ र कार्यालय सहयोगी ६ दरबन्दीमा ३ जना रहेका छन् । भन्सार अधिकृत पौडेलले जनशक्तिको अभावमा राजश्व संकलनमा सकस भएको बताइन् । सशस्त्र प्रहरीका एक अधिकारीका अनुसार नाकामा छोटी भन्सार कार्यालय नहुँदा बरामद गरिएको सामान गुलरिया पुराउदा झन्झटिलो हुने गरेको गुनासो पोखे ।

कमल पन्थी कान्तिपुरका बर्दिया संवाददाता हुन् ।