सभापति थापाले रसुवा, नुवाकोट र धादिङका बाढी प्रभावित बस्ती तथा होल्डिङ सेन्टर पुगेर प्रभावितहरूसँग भेटघाट, छलफल र अन्तरक्रिया गर्ने कार्यक्रम छ।
काठमाडौँ — नेपाली कांग्रेसका सभापति गगनकुमार थापा भोटेकोसी बाढी प्रभावित क्षेत्रको अवस्था बुझ्न स्थलगत भ्रमणमा गएका छन्। उनले रसुवा, नुवाकोट र धादिङका बाढी प्रभावित बस्ती तथा होल्डिङ सेन्टर पुगेर प्रभावितहरूसँग भेटघाट, छलफल र अन्तरक्रिया गर्ने कार्यक्रम छ।
थापा टोखा–छहरे हुँदै नुवाकोटको बेत्रावती पुगेका छन्। त्यहाँ उनले रसुवा र नुवाकोट दुवैतर्फका बाढी प्रभावित स्थानीयसँग भेटघाट तथा अन्तरक्रिया गर्नेछन्। त्यसपछि रसुवाको बोगटीटारस्थित होल्डिङ सेन्टर पुगेर त्यहाँ आश्रय लिइरहेका प्रभावितसँग छलफल गर्ने कार्यक्रम छ।
बोगटीटारबाट नुवाकोट फर्किएर उनले ढुंगे र त्रिशूली बजारका बाढी प्रभावितसँग भेटघाट तथा अन्तरक्रिया गर्नेछन्। विदुरमा बाढी प्रभावित सरोकार समितिका प्रतिनिधिसँग पनि छलफल गर्ने कार्यक्रम छ।
त्यसपछि विदुर नगरपालिका–५, पिपलटारमा नुवाकोट र रसुवाका प्रभावितलाई राखिएका पाँचवटा होल्डिङ सेन्टरको अवलोकन गरी प्रभावितहरूसँग छलफल गर्नेछन्।
नुवाकोटको देवीघाट हुँदै धादिङको गल्छी र गजुरी पुगेर त्यहाँका बाढी प्रभावितसँग पनि भेटघाट तथा अन्तरक्रिया गर्ने कार्यक्रम छ। त्यसपछि थापा गल्छीबाटै काठमाडौं फर्कने थापाको सचिवालयले जानकारी दिएको छ।