Trending
Prev Story
Next Story

चिनियाँ सुन तस्करको ‘हिट–लिस्ट’ बन्यो विमानस्थल

Onlinekhabar •
November 20, 2026 • 12:00 PM
2
2 reads 0 reactions

४ मंसिर, काठमाडौं । त्रिभुवन अन्तर्राष्ट्रिय विमानस्थलबाट १ किलो ६५० ग्राम सुनसहित २ मंसिरमा एक चिनियाँ नागरिक पक्राउ परे । हिमालयन एअरलाइन्सको उडान नम्बर एच९३५३ नम्बरको जहाज दुबईबाट २ मंसिर ११:४१ बजे काठमाडौं आएका चिनियाँ नागरिक …

चिनियाँ सुन तस्करको ‘हिट–लिस्ट’ बन्यो विमानस्थल

४ मंसिर, काठमाडौं । त्रिभुवन अन्तर्राष्ट्रिय विमानस्थलबाट १ किलो ६५० ग्राम सुनसहित २ मंसिरमा एक चिनियाँ नागरिक पक्राउ परे ।

हिमालयन एअरलाइन्सको उडान नम्बर एच९३५३ नम्बरको जहाज दुबईबाट २ मंसिर ११:४१ बजे काठमाडौं आएका चिनियाँ नागरिक बिनबिन ली सुनसहित विमानस्थलमा समातिएका थिए ।

विमानस्थल भन्सार कार्यालय र सशस्त्र प्रहरी बलको संयुक्त सुरक्षा जाँचको क्रममा ती चिनियाँ नागरिकको गतिविधि शंकास्पद देखियो ।

विमानस्थलको भन्सार क्षेत्रमा रहेको ‘वाक थु्र’ गेटमा जाँच गर्ने क्रममा उनले हातमा एउटा ज्याकेट बोकेका थिए । हातमा बोकेको ज्याकेटको खल्ती छाम्दा सुनका चार वटा पोका भेटिएको सशस्त्र प्रहरी बलका सहप्रवक्ता शैलेन्द्र थापाले बताए ।

औषधिको क्याप्सुल आकार बनाई प्लाटिकले मोरेर ल्याइएका सुनका डल्ला (१ किलो ६५० ग्राम) फेला परेपछि उनलाई नियन्त्रणमा लिइयो । अहिले लीमाथि विमानस्थल भन्सार कार्यालयले अनुसन्धान गरिरहेको छ ।

डेढ किलो सुनसहित एक चिनियाँ पक्राउ परेको ११ घण्टाअघि यस्तै प्रकारको घटना विमानस्थलमा भएको थियो । २ मंसिर बिहान १:२५ बजे हङकङबाट काठमाडौंका लागि उडेको नेपाल वायु सेवा निगमको उडान नम्बर आरए४१० नम्बरको जहाज अवतरण भयो ।

यो जहाजका यात्रुमध्ये एक थिए चीनको जिलिनका ५८ वर्षीय जिआन्हु वाङ । विमानस्थल भन्सार कार्यालय र सशस्त्र प्रहरीको सुरक्षासमेत जाँचपास गरेर उनी बाहिरिए ।

विमानस्थलको सुरक्षा जाँचपास गरेर बाहिरिएका उनै चिनियाँ वाङलाई भने विमानस्थलस्थित नेपाल प्रहरीले पक्राउ गर्‍यो । शंकास्पद गतिविधिपछि पक्राउ गरी जाँच गर्दा फेला पर्‍यो १ किलो ८०३ ग्राम सुन ।

विमानस्थल प्रहरीका सूचना अधिकारी डीएसपी ढुण्डीराज नेउपानेका अनुसार मलद्वारभित्र प्लास्टिकले बेरेर उनले उक्त सुन ल्याएका थिए । अर्धठोस बनाएर औषधिको क्याप्सुल जस्तो आकारमा प्लास्टिकले मोरेर उनले सुन ल्याएका थिए । ११ घण्टाको फरकमा भएका यी दुवै घटनाको थप अनुसन्धान विमानस्थल प्रहरीले गरिरहेको छ ।

यसको तीन दिनअघि पनि चिनियाँ नागरिक नै विमानस्थलबाट सुनसहित पक्राउ परेका थिए । २९ कात्तिक १०:३० बजे हङकङबाट क्याथे प्यासिफिकको जहाजमार्फत काठमाडौं आएका ४२ वर्षीय झाङ गोक्विङ समातिए ।

गालेर अर्धठोस बनाइएको सुनलाई प्लास्टिकले मोरेर अन्डरवेयरभित्र लुकाएर ल्याएको अवस्थामा वाङ पक्राउ परेका थिए । उनीबाट अर्धठोस आकारका २ थान अर्थात् ६३५.९६ ग्राम सुन बरामद भएको थियो ।

तीन दिनको बीचमा भएका तीन फरक घटनामा तीन चिनियाँ नागरिक पक्राउ परेका छन् । यो घटनाले विमानस्थलको रुट प्रयोग गर्दै चिनियाँ सुन तस्करले नेपालमा सुन भित्र्याउने गरेको देखिएको छ ।

यसअघि दोलखा नाका, सिन्धुपाल्चोक नाका, रसुवागढी नाकाबाट छिराइएको सुन प्रहरीले बरामद गरेको थियो । अहिले सिन्धुपाल्चोक र रसुवागढी नाका बन्द छ । अन्य नाकाबाट छिरेका सुन भने पछिल्लो समय प्रहरीले बरामद गरेको छैन ।

पछिल्लो समय विमानस्थलबाटै भित्रिएका सुन बरामद हुनु र चिनियाँ नागरिक पक्राउ पर्नुले चिनियाँ सुन तस्करले हवाई रुट प्रयोग गर्दै सुन भित्र्याउने गरेको प्रहरीको बुझाइ छ ।

‘अहिले स्थलमार्गबाट भित्रिएका सुनभन्दा पनि हवाई रुटबाट भित्रिएका सुन बरामद भएका छन् । यो घटनाले चिनियाँ सुन तस्करले विमानस्थल प्रयोग गर्न थालेको देखिन्छ,’ एक अनुसन्धान अधिकारी भन्छन् ।

तीन दिनको बीचमा भएका तीन घटना मात्रै होइन, यसअघि बुढानीलकण्ठबाट बरामद भएको साढे २१ किलो सुनसमेत विमानस्थलबाट नेपाल भित्रिएको प्रहरीको बुझाइ छ ।

अनुसन्धानका क्रममा चिनियाँ नागरिकले भाडामा लिएको गाडी पटकपटक विमानस्थल आउजाउ गरेको देखिएको छ । दैनिक ८ हजार रुपैयाँ तिर्ने गरी चिनियाँ नागरिकले ११ असोजदेखि २५ असोजसम्मका लागि कार भाडामा लिएका थिए । यो कार पाँच पटकसम्म विमानस्थल पुगेको देखिएको एक अनुसन्धान अधिकृतले बताए ।

‘११ दिनको अवधिमा यो कार पाँच पटकसम्म विमानस्थलको पार्किङ एरियासम्म पुगेर आएको देखिन्छ,’ ती अनुसन्धान अधिकृत भन्छन्, ‘कारको शंकास्पद गतिविधिले पनि सुन हवाई रुट हुँदै आएको हाम्रो विश्लेषण छ ।’

उक्त कार चिनियाँ नागरिक हान फिईले भाडामा लिएका थिए । ११ असोजमा काठमाडौं ओर्लनासाथ हान फिईले रिकन्डिसन तथा रेन्टल हाउसबाट भाडामा लिएका थिए । यो कार सुन ओसार्नकै लागि भाडामा लिइएको प्रहरी अनुसन्धानबाट खुलेको छ ।

२२ असोज बिहान काठमाडौं उपत्यका अपराध अनुसन्धान कार्यालयले छापा मार्दा पनि कारमा दुई केजीका सुनका दुई वटा बिस्कुट भेटिएका थिए । एक/एक किलोका दुई वटा बिस्कुट कागजमा ‍र्‍याप गरेको अवस्थामा चालक सिट नजिकको बक्समा फेला परेको थियो ।

त्यसैगरी, सुनसहित पक्राउ परेका ती चिनियाँ नागरिक पनि हवाई रुट हुँदै हङकङबाट काठमाडौं आएका थिए । अहिले बरामद भएको सुन हवाई रुटबाट काठमाडौं भित्रिएको आशंका प्रहरीले गरेको छ ।

सुनसहित पक्राउ परेका चीनको जियाङ्सु ग्वाङडोङका २७ वर्षी हान फिई, सोही ठाउँका ४७ वर्षीय चोउ लङसिन र सोही ठाउँका ३७ वर्षीय वाङ जियान्जेन पुर्पक्षका लागि कारागार चलान भइसकेको अपराध अनुसन्धान कार्यालयका एसएसपी सन्तोष खड्काले बताए ।

उनीहरूमध्ये २ जना ११ असोजमा र १ जना १५ असोजमा त्रिभुवन अन्तर्राष्ट्रिय विमानस्थलमा ओर्लिएको अध्यागमनको रेकर्डमा देखिन्छ ।

काठमाडौं ओर्लिएपछि उनीहरू पटकपटक एअरपोर्ट गएको पनि भेटिएको प्रहरीले स्रोतले बतायो । काठमाडौंमा रहँदा पनि विमानस्थलमा ओहोरदोहार भइरहेको, पाँच पटकसम्म भाडामा लिएको कार विमानस्थल पुगेको र उनीहरू हवाई रुट हुँदै काठमाडौं भित्रिएकाले बरामद सुन पनि हवाई रुटबाटै काठमाडौं भित्रिएको प्रहरीको विश्लेषण छ ।

लेसिलो आकार बनाएर सुन ल्याउँदा सहज हुने, लुकाउन मिल्ने भएकाले उनीहरूले उक्त स्वरूपमा हवाई रुटबाटै सुन ल्याएको हुनसक्ने प्रहरीले विश्लेषण गरेको छ ।

एक भन्सार अधिकृतका अनुसार गालेर अर्धठोस रूपमा प्लास्टिकले मोरेर ल्याइएको सुन विमानस्थलको डिटेक्टर मेसिनबाट पत्ता लगाउन गाह्रो हुने भएकाले तस्करले विमानस्थलाई टार्गेट बनाउने गरेका छन् ।

‘सग्लो रूपमा ल्याइएका सुन डिटेक्टर मेसिनले थाहा पाउने भएपछि गालेर अर्धठोस रूपमा प्लास्टिकले मोरेर शरीरका विभिन्न अगंमा लुकाएर ल्याउने र केहीले मलद्वारमा समेत ल्याउने गरेको देखिन्छ । यस्ता घटनाहरू भने सुराकीको आधारबिना पत्ता लगाउन गाह्रो हुन्छ । मेसिनले यस्तो पत्ता लगाउन सक्दैन,’ विमानस्थल भन्सारका एक अधिकृत भन्छन् ।

ती भन्सार अधिकृतले भने जस्तै अहिले विमानस्थलको जाँचपास भएपछि बरामद भएका जति पनि सुनहरू छन् ती सबै अर्धठोस रूपमा प्लास्टिकले मोरेर ल्याएको अवस्थामा बरामद भएका छन् ।

चिनियाँ नागरिक बाहेक केही भारतीय र बंगलादेशी नागरिक पनि पछिल्लो समय विमानस्थल हुँदै सुन तस्करी गर्दा पक्राउ परेका छन् ।

गत ८ असोजमा दुबईबाट फ्लाई दुबईको एफजेट५७३ नम्बरको उडानमार्फत काठमाडौं आएका भारतीय नागरिक मोहमद चेरा थोडी ५३५ ग्राम सुनसहित पक्राउ परेका थिए । उनले अन्डरवेयरभित्र प्लास्टिकले र्‍यापिङ गरेको अवस्थामा अर्धठोस आकारमा सुन ल्याएका थिए । उनलाई विमानस्थलको सुरक्षा जाँच पास गरेपछि प्रहरीले पक्राउ गरेको थियो ।

ती भन्सार अधिकृतले भने जस्तै अर्धठोस बनाएर प्लास्टिकले र्‍याप गरेपछि डिटेक्टर मेसिनले सुनको संकेत दिन गाह्रो हुँदा सुन तस्करले यस्तै शैली अपनाएर विमानस्थलमार्फत सुन छिराउने गरेका छन् ।

२ साउन २०८० मा त्रिभुवन अन्तर्राष्ट्रिय विमानस्थलबाट बाहिरिएको ६० किलो ७१६ ग्राम सुन राजस्व अनुसन्धान विभागले बरामद गरेको थियो । यो घटनापछि विमानस्थलबाट हुने सुन तस्करीमा निकै कमी आएको थियो । लामो समयसम्म विमानस्थलको रुट प्रयोग गरी तस्करी भएका सुन प्रहरी तथा भन्सारले बरामद गरेको थिएन ।

तर, अहिले फेरि विमानस्थलकै रुट हुँदै सुन तस्करी हुन थालेको छ । यसले विमानस्थलको सुरक्षा संयन्त्र तथा जाँचपासको प्रावधान तथ शैलीमाथि पनि प्रश्न उठाएको छ ।

नेपाल प्रहरीको तथ्यांकअनुसार पछिल्लो १० आर्थिक वर्षमा ५७९ किलो २१८ ग्राम तस्करीको सुन बरामद भएको छ । जसमा ७६८ जना पक्राउ परेका छन् ।

चिनियाँ मात्रै होइन, नेपालीलाई भरिया बनाएर पनि सुन तस्करी हुने गरेको छ । विशेषगरी बाह्य मुलुकमा काम गर्न गएका कामदाहरूलाई तस्करले भरियाको रूपमा प्रयोग गरेर विभिन्न गहनाको आकारमा सुन नेपाल छिराउने गरेका छन् ।

केही पैसाको प्रलोभन देखाएर तथा स्वदेश फर्कन लागेका नेपालीहरूलाई हवाई टिकटसमेत काटिदिएर तस्करहरूले गरगहनाको आकारमा सुन बोकाएर पठाउने गरेका छन् ।

त्रिभुवन अन्तर्राष्ट्रिय विमानस्थल सुरक्षा कार्यालय सानो गौचरणको तथ्यांकअनुसार गत साउन र भदौ महिनामा मात्रै ४५ जना नेपाली भरिया पक्राउ परेका छन् ।

उनीहरूले बोकेर ल्याएको १ किलो ६४३ ग्राम सुनसमेत प्रहरीले बरामद गरेको थियो । यसका लागि तस्करहरूले दुबईलगायत खाडी मुलुकमा भरिया खोज्न मान्छे नै खटाउने गरेको प्रहरी अधिकारीहरू बताउँछन् ।

अधिकारी अनलाइनखबरका लागि सुरक्षा, अपराध विषयमा रिपोर्टिङ गर्छन् ।

Prev Swipe Story Next

Same Story from Other Publications

Compare how 3 other independent news outlets reported on this story.

3 Publications
Hamro Patro News
1d ago
काठमाडौंमा चार राष्ट्रबीच कबड्डी च्याम्पियनसिप हुँदै, नेपालको पहिलो खेल थाइल्यान्डसँग

काठमाडौंमा चार राष्ट्रबीच कबड्डी च्याम्पियनसिप हुँदै, नेपालको पहिलो खेल थाइल्यान्डसँग

काठमाडौं, मंसिर ४ । काठमाडौंमा आगामी नोभेम्बर २१ देखि २३ (मंसिर ६ देखि ८) गतेसम्म चार राष्ट्र सम्मिलित ‘फोर नेसन्स कप कबड्डी च्याम्पियनसिप–२०२६’ आयोजना हुने भएको छ। अखिल नेपाल कबड्डी संघको आयोजनाम...

#मंसिर #काठमाडौं
Compare →
Bizshala
6h ago
उच्च मूल्यमा सुन किन्नेले गुमाए लाखौँ, अझै घट्ला कि अब बढ्ला ?

उच्च मूल्यमा सुन किन्नेले गुमाए लाखौँ, अझै घट्ला कि अब बढ्ला ?

काठमाण्डौ । लगातार उकालो लागेर कीर्तिमानी उचाइमा पुगेको सुनको मूल्यमा पछिल्लो समय भारी गिरावट आएको छ। अन्तर्राष्ट्रिय...

#काठमाडौं #सुन
Compare →
Ekantipur
1d ago
परराष्ट्रमन्त्री खनालसँग चिनियाँ राजदूत चाङको भेटवार्ता, तातोपानी नाका तत्काल खुलाउन जोड

परराष्ट्रमन्त्री खनालसँग चिनियाँ राजदूत चाङको भेटवार्ता, तातोपानी नाका तत्काल खुलाउन जोड

सिंहदरबारस्थित परराष्ट्र मन्त्रालयमा परराष्ट्रमन्त्री खनालसँग चिनियाँ राजदूत चाङ माओमिङले शिष्टाचार भेट गरेका थिए ।

#चिनियाँ
Compare →

Related Stories

Technology
Build #2612