कान्तिपुरले विराटनगरमा आयोजना गरेको ‘उज्यालो पूर्व, सम्भावनाबाट समृद्धितर्फ’ कार्यक्रममा बोल्दै अर्थमन्त्री स्वर्णिम वाग्लेले आर्थिक सुधारको प्याकेज अगाडि बढाएको बताए ।
काठमाडौँ — अर्थमन्त्री डा. स्वर्णिम वाग्लेले सरकारले केही सातामै अन्तरिम आर्थिक उपाय (इन्टरिम इकोनोमिक मेजर्ड) को घोषणा गर्ने तयारी गरिरहेको बताएका छन् ।
कान्तिपुरले कोशी प्रदेशको विराटनगरमा आयोजना गरेको ‘उज्यालो पूर्व, सम्भावनाबाट समृद्धितर्फ’ कार्यक्रममा बोल्दै अर्थमन्त्री वाग्लेले यस्तो बताएका हुन् ।
उनले अर्थतन्त्रमा केही समयको लागि मात्रै उत्साह सृजना गर्नु सरकारको योजना नभएको लगानी र उद्यमशीलतालाई निरूत्साहित गर्दै आएका संरचनात्मक समस्याको समाधान गर्नु रहेको बताएका छन् ।
उनले भने,‘अर्थमन्त्रीदेखि प्रधानमन्त्रीसम्म हामी निजी क्षेत्रसँग निरन्तर संवाद गरिरहेका छौं । यही संवादको आधारमा अर्को आर्थिक सुधारको प्याकेज अगाडि बढाएका छौं । अबको केही सातामै हामी अन्तरिम आर्थिक उपाय (इन्टरिम इकोनोमीक मेजर्ड) अगाडि बढाउँदैछौं ।’
भोटेकोशीमा गएको बाढीको कारण यस्तो प्याकेज घोषणा गर्न केही समय लागेको उनको भनाइ छ । यसको उद्देश्य आर्थिक गतिविधिमा तत्काल सहजता ल्यउनुका साथै, लगानी, उत्पादन र व्यवसायिक वातावरणमा रहेको अवरोध घटाउनु रहेको उनले बताए ।