अर्थमन्त्री स्वर्णिम वाग्लेले प्रतिकूल परिस्थिति र संकटकाबीच पनि सरकारले आर्थिक सुधारको गति नरोकेको बताएका छन् ।
विराटनगर — कान्तिपुर मिडिया ग्रुपले शुक्रबार विराटनगरमा आयोजना गरेको ‘उज्यालो पूर्व: सम्भावनाबाट समृद्धितर्फ’ कार्यक्रममा बोल्दै अर्थमन्त्री वाग्लेले कठिन परिस्थितिलाई निष्क्रियताको औचित्य बनाउन नसकिने बताए ।
उनले भने, ‘संकटका बीच पनि हामीले सुधारको गति रोकेका छैनौँ । आर्थिक स्थायित्व कायम राख्दै लगानीको विश्वास फर्काउने, सार्वजनिक संस्थाको कार्यशैली बदल्ने र उत्पादनशील अर्थतन्त्रको आधार निर्माण गर्ने कुरालाई सँगसँगै अघि बढाएका छौँ ।’
निजी क्षेत्रले लामो समयदेखि नीतिगत अनिश्चितता, प्रशासनिक झन्झट र लगानी वातावरणका कठिनाइ भोग्दै आएकाले उद्यमीको मनोबल कमजोर बनेको र क्षेत्र ‘पर्ख र हेर’ को अवस्थामा पुगेको उनले उल्लेख गरे । यही पृष्ठभूमिमा आफूहरूले आर्थिक पुनरुत्थानको जिम्मेवारी लिएको वाग्लेको भनाइ छ ।
अर्थमन्त्री वाग्लेका अनुसार विश्वव्यापी द्वन्द्व, ऊर्जा बजारको अनिश्चितता, आपूर्ति शृंखलामा अवरोध र बाह्य आर्थिक प्रतिकूलताले अर्थतन्त्रमा थप दबाब सिर्जना गरेका छन् । रसुवा-भोटेकोशी क्षेत्रमा आएको अकल्पनीय बाढीले आर्थिक पूर्वाधार र जनजीवनमा गम्भीर चुनौती थपेको उनले बताए ।
आफूहरूले एकैसाथ दुईवटा जिम्मेवारी निर्वाह गर्नुपरेको उल्लेख गर्दै वाग्लेले तात्कालिक संकट सम्हाल्ने र अर्थतन्त्रलाई दीर्घकालीन रूपमा कमजोर बनाइरहेका संरचनागत समस्या समाधान गर्ने काम सँगसँगै भइरहेको बताए ।
‘सुधारको प्रतिफल देखिन केही समय लाग्छ,’ उनले भने, ‘वर्षौँदेखि जरा गाडेका विकृति र संस्थागत कमजोरी केही महिनामा समाप्त हुँदैन ।’