शुक्रबार हुने प्रतियोगितामा नेपालसहित भारत, बंगलादेश, अफगानिस्तान र इथोपियाका गरी करिब ७ सय ५० खेलाडी सहभागी हुने बताइएको छ ।
काठमाडौँ — नेपाल अन्तर्राष्ट्रिय तेक्वान्दो महासंघ (आईटीएफ) को आयोजनामा हुने आठौं दक्षिण एसियाली आईटीएफ तेक्वान्दो प्रतियोगिताको तयारी पूरा भएको छ ।
शुक्रबार सुरु हुने प्रतियोगिताको तयारी पूरा भएको आयोजक महासंघका महासचिव घमबहादुर थापाले जनाएका छन् । प्रतियोगितामा नेपालसहित भारत, बंगलादेश, अफगानिस्तान र इथोपियाका गरी करिब ७ सय ५० खेलाडी सहभागी हुने बताइएको छ ।
प्रतियोगितामा जुनियर, क्याडेट, युथ, एडल्ट र भेट्रानमा सिंगल/ग्रुप स्पाइरिङ र प्याटर्न तथा सेल्फ डिफेन्स विधामा प्रतिस्पर्धा हुनेछ । कुल ३ सय ६० स्वर्णका लागि भिडन्त हुनेछ ।
दक्षिण एसियाली आईटीएफ तेक्वान्दो महासंघका अध्यक्ष ग्रान्ड मास्टर राजेन्द्रन बलान र महासचिव महासचिव अब्दु रहिमन मंगला सेरीलगायतको टोली पनि काठमाडौं आइसकेको आयोजक महासंघका अध्यक्ष प्रवीणकुमार कार्कीले बताए ।
सहभागी सबै राष्ट्रबाट सहभागी हुने खेलाडी र अफिसियल काठमाडौं आइसकेको महासचिव थापाले बताए । तीनदिने प्रतियोगिताका खेल त्रिपुरेश्वरस्थित राष्ट्रिय खेलकुद परिषद्को कभर्डहल हुनेछ ।
नेपालले दक्षिण एसियाली आईटीएफ तेक्वान्दो प्रतियोगिता आयोजना गर्न लागेको यो पाँचौं पटक हो । बाँकी ३ संस्करण भारतले आयोजना गरेको थियो ।