कप्तान डेभिड मिलर भित्रिएपछि लगातार चार खेल गुमाएर नेपाल प्रिमियर लिग (एनपिएल) बाट बाहिरिएको कर्णाली याक्सले आफ्नो अन्तिम लिग खेलमा सान्त्वना जित निकालेको छ।
कीर्तिपुरमा आइतबार सम्पन्न खेलमा कर्णालीले चितवन राइनोजलाई २४ रनले पराजित गर्यो।
ठुलो अपेक्षासहित कर्णालीमा आबद्ध भएका कप्तान मिलर लिगको अन्तिम खेलमा पनि ब्याटिङमा पूरै ‘फ्लप’ साबित भए। चौथो नम्बरमा ब्याटिङ गर्न आएका मिलर ८ बलमा एक चौकासमेत प्रहार नगरी ५ रनमै उसामा मिरको बलमा कुशल मल्लबाट क्याचआउट भए।
मिलर टोलीमा आएपछि काठमाडौं, सुदूरपश्चिम, पोखरा र लुम्बिनीविरुद्ध लगातार चार हार बेहोरेको कर्णालीको साख अन्तिम खेलमा भने हुसेन तलातको अलराउन्ड प्रदर्शनले जोगायो।
कर्णालीले दिएको १५४ रनको लक्ष्य पछ्याएको चितवन १९.१ ओभरमा १२९ रनमै अलआउट भयो। जितसँगै कर्णालीले ७ खेलबाट ६ अङ्क जोडे पनि चौथो स्थानमा रहेको चितवनको ७ अङ्क रहेकाले कर्णालीको जित केवल औपचारिकता र सान्त्वनामै सीमित बन्यो।
लक्ष्य पछ्याउने क्रममा चितवनले सुरुवातदेखि नै नियमित विकेट गुमाएको थियो। कामिल मिशाराले २५, कुशल मल्लले १८ र देव खनालले १४ रन जोडे पनि कप्तान सिकन्दर राजा २, विवेक यादव ६, ड्यान माउसली ८ र सलाहुद्दिन खान ७ रनमै आउट हुँदा चितवन ८९-७ को सङ्कटमा पर्यो।
अन्त्यतिर उसामा मिरले अविजित २८ र अशोक धामीले ११ रन जोडेर सङ्घर्ष गरे पनि टिमलाई जित दिलाउन सकेनन्। कमल ऐरी र रिजन ढकाल समान १-१ रनमा आउट भए।
चितवनको इनिङ्स ध्वस्त पार्न कर्णालीका हुसेन तलातले ३.१ ओभरमा १७ रन खर्चेर सर्वाधिक ३ विकेट लिए। यस्तै, पवन सर्राफले ४ ओभरमा १९ रन तथा मार्क वाटले ४ ओभरमा ३४ रन दिएर समान २-२ विकेट हात पारे भने सोमपाल कामीले १ विकेट लिए।
ब्याटिङमा निराश पारेका मिलरले फिल्डिङमा भने २ क्याच लिए।
यसअघि पहिले ब्याटिङ गरेको कर्णालीले निर्धारित २० ओभरमा ८ विकेट गुमाएर १५३ रन बनाएको थियो। अरिफुल इस्लामले १५ बलमा ४ चौका र २ छक्कासहित ३५ रनको आक्रामक सुरुवात दिलाए पनि मध्यक्रम धर्मराएको थियो।
सचिन शर्मा शून्य, दीपक डुम्रे ७, कप्तान मिलर ५, पवन सर्राफ १५, सोमपाल कामी ४ र मार्क वाट ६ रनमा आउट भएपछि कर्णाली १२.२ ओभरमा ८०-६ को नाजुक अवस्थामा पुगेको थियो।
सङ्कटमा परेको कर्णालीलाई हुसेन तलातले ३३ बलमा २ चौका र ३ छक्कासहित अविजित ५१ रनको अर्धशतकीय इनिङ्स खेल्दै उकासे।
उनलाई गुलशन झाले ६ बलमा १८ रन तथा नन्दन यादवले अविजित २ रन बनाएर साथ दिए। बलिङतर्फ चितवनका कमल ऐरी, सलाहुद्दिन खान र उसामा मिरले समान २-२ विकेट लिए भने सिकन्दर राजा र रिजन ढकालले १-१ विकेट हात पारे।
लिगको सुरुवाती दुई खेलमा अक्टोबर २७ मा जनकपुर बोल्ट्सलाई १९ रन र अक्टोबर २९ मा विराटनगर किङ्सलाई ४ विकेटले हराएको कर्णालीले मिलरको आगमनपछि लय गुमाएको थियो।
त्यसयता नोभेम्बर २ मा काठमाडौंसँग ४ विकेट, नोभेम्बर ६ मा सुदूरपश्चिमसँग ३९ रन, नोभेम्बर ९ मा पोखरासँग ६३ रन र नोभेम्बर १२ मा लुम्बिनीसँग ४ विकेटले पराजित भएपछि कर्णालीको प्लेअफ यात्रा समाप्त भएको थियो।
प्रकाशित: २९ कार्तिक २०८३ १६:१९ आइतबार
