एनपीएलको मैदानबाट जलवायु सम्बन्धी आवाज

खेल चलिरहेका बेला विद्यार्थीहरूले ‘क्लाइमेट जस्टिस’ लेखिएका प्लेकार्ड प्रदर्शन गर्दै जलवायु न्यायको माग गरेका हुन्।

काठमाडौँ — नेपाल प्रिमियर लिग (एनपीएल) अन्तर्गत शनिबार लुम्बिनी लायन्स र विराटनगर किङ्सबीच भएको खेलका क्रममा विद्यार्थीहरूले जलवायु संकटबारे आवाज उठाएका छन्।

खेल चलिरहेका बेला विद्यार्थीहरूले ‘क्लाइमेट जस्टिस’ लेखिएका प्लेकार्ड प्रदर्शन गर्दै जलवायु न्यायको माग गरेका हुन्।

बाढीपहिरो तथा जलवायुजन्य विपद्बाट प्रभावित नागरिकको पीडालाई स्मरण गराउँदै उनीहरूले जलवायु संकटप्रति सम्बन्धित निकायको ध्यानाकर्षण गराएका थिए।

नेपाल विद्यार्थी संघका पूर्व अध्यक्ष दुजाङ शेर्पाको पहलमा भएको उक्त प्रदर्शनलाई युवापुस्ताले जलवायु संकटका विषयमा सार्वजनिक मञ्चबाट आवाज उठाउने प्रयासका रूपमा लिइएको छ।

शेर्पाले यो केवल प्रदर्शन नभई न्याय र जवाफदेहीताका लागि युवापुस्ताले उठाएको आवाज भएको बताए। ‘जलवायु न्याय चाहिन्छ, आश्वासन होइन; जवाफदेहिता चाहिन्छ, मौनता होइन,’ प्रदर्शनको सन्देश थियो।