गुण्डुका किसान मखमली फूल टिप्न व्यस्त

तिहारका बेला मात्रै गुण्डुबाट मखमली र सयपत्रीका फूल ४ करोड रूपैयाँसम्मको बिक्री हुने गरेको सूर्यविनायक नगरपालिकाका प्रवक्ता रविन्द्र सापकोटाले जानकारी दिए ।

भक्तपुर — तिहार नजिकिएसँगै भक्तपुर गुण्डुका किसान मखमली फूल टिप्न व्यस्त बनेका छन् । उनीहरू तिहारको भाइटीकाका लागि आवश्यक मखमली फूलको माला टिप्ने, गाँस्ने र बजार पुर्‍याउने चटारोमा छन् ।

गुण्डुका केही किसानले मखमलीसँगै सयपत्री फूलको व्यवसायिक खेती पनि गर्दै आएका छन् । यहाँ उत्पादित माला देशका मुख्य शहरहरूका साथै विदेशमा समेत पुग्ने गरेको किसानहरू बताउँछन् । किसानले उत्पादन गरेको माला किन्न व्यापारीहरू घरमै समेत पुग्न थालेका छन् । उनीहरूले प्रतिमाला २५ देखि ३० रुपैयाँसम्ममा किन्ने गरेका छन् ।

मखमली फूल तिहारको भाइटीकाको दिन दिदी-बहिनीले दाजुभाइलाई दीर्घायूको कामना गर्दै लगाइदिने गर्छन् । यहाँ फूल खेती गरेका प्रत्येक किसानले २ देखि ३ हजार माला बनाएर बेच्ने गरेको सूर्यविनायक नगरपालिकाका प्रवक्ता एवं  वडा नम्वर ७ का अध्यक्ष रविन्द्र सापकोटाले जानकारी दिए । तिहारका बेला गुण्डुबाट मात्रै मखमली र सयपत्रीका फूल ४ करोड रूपैयाँसम्मको बिक्री हुने गरेको उनको भनाइ छ ।

सुन्दर शिल्पकार कान्तिपुर मिडिया ग्रुपका भक्तपुर संवाददाता हुन् ।