आईजीपीले हेडक्वार्टरमा किन बोलाए आकस्मिक पीसीसी बैठक ?

नक्सालस्थित प्रहरी प्रधान कार्यालयमा हुने बैठकमा डीआईजीदेखि माथिल्लो तहका अधिकारी र प्रदेशमा कार्यरत डीआईजीहरू सहभागी हुनेछन्।

काठमाडौँ — प्रहरी महानिरीक्षक (आईजीपी) दानबहादुर कार्कीले नेपाल प्रहरीको पोलिसी कोअर्डिनेसन कमिटी (पीसीसी) को बैठक बोलाएका छन् । प्रहरी प्रधान कार्यालय, नक्सालमा बोलाइएको बैठकमा प्रहरी नायब महानिरीक्षक (डीआईजी) देखि माथिल्लो तहका अधिकारीहरू सहभागी हुनेछन् ।

आज अपराह्न बस्ने तय भएको बैठकका लागि प्रदेशमा कार्यरत डीआईजीहरूलाई समेत काठमाडौंमा उपस्थित हुन भनिएको छ । आईजीपी कार्कीले किन आकस्मिक रूपमा पीसीसी बैठक बोलाए भन्नेबारे औपचारिक जानकारी दिइएको छैन । तर, सरकारले आईजीपी कार्कीलाई राजीनामा दिन दबाब दिएको भन्दै समाचारहरू सार्वजनिक भएपछि उत्पन्न परिस्थितिबारे छलफल हुन सक्ने एक अधिकारीले बताए ।

‘समसामयिक विषयमा छलफल गर्ने भनिएको छ, त्यही विषय हुन सक्छ,’ ती अधिकृतले भने ।

आईजीपी कार्कीनिकट एक उच्च अधिकृतका अनुसार, पीसीसी बैठकका तीन मुख्य एजेन्डा छन् । पहिलो, बाहिर सार्वजनिक भएका विषयवस्तुले प्रहरीको चेन अफ कमान्ड र कार्यसम्पादनमै असर पार्न सक्ने अवस्था देखिएपछि आईजीपी कार्कीले त्यसबारे स्पष्ट पार्न खोजेका हुन् ।

‘बाहिर धेरै अफवाह फैलिइरहेको छ, त्यसले काममा असर नगरोस् भनेर उहाँले स्पष्टसँग भन्न खोज्नुभएको हो,’ ती अधिकृतले भने ।

आईजीपी कार्कीले बुधबार उपत्यका प्रहरी कार्यालय, प्रदेश प्रहरी कार्यालय, तालिम केन्द्र र जिल्ला प्रहरी कार्यालयका प्रमुखहरूदेखि प्रहरी निरीक्षक तहसम्मका कार्यालय प्रमुखलाई भर्चुअल कन्फरेन्समार्फत सम्बोधन गरेका थिए । त्यसक्रममा उनले प्रहरी अधिकारीहरू एकअर्काविरुद्ध र आफ्नै संगठनका सहकर्मीविरुद्ध लाग्ने गरेको भन्दै त्यसो नगर्न सचेत गराएका थिए ।

ब्याचीहरूबीचसमेत सौहार्दपूर्ण सम्बन्ध कायम हुन छाडेको भन्दै आईजीपी कार्कीले त्यसमा सुधार ल्याउन खोजेको बताएका थिए । ‘ती विषयहरू फेरि पनि उठ्नेछन्,’ एक अधिकृतले भने ।

बैठकको दोस्रो एजेन्डा केही प्रहरी अधिकृतहरू अनुचित क्रियाकलापमा संलग्न भएको विषयमा रहेको स्रोतको दाबी छ ।

‘कतिपयले मनलाग्दी रूपमा अनुसन्धानका विवरण सार्वजनिक गरिदिने, अनुसन्धानलाई नै प्रभावित पार्ने जस्ता गतिविधि भएका छन् । त्यस विषयमा पनि छलफल हुनेछ,’ प्रहरी स्रोतले भन्यो ।

तेस्रो विषय तिहारपछि आन्दोलन हुने भन्दै फैलाइएका हल्लासँग सम्बन्धित रहेको अधिकारीहरूको भनाइ छ । तिहारपछि सरकारलाई नै अप्ठ्यारो पार्ने गरी आन्दोलन हुने भन्दै भइरहेका प्रचार, त्यसको वास्तविक अवस्था र अपनाउनुपर्ने सतर्कताबारे छलफल हुने स्रोतको भनाइ छ ।

‘केही तनावका क्षेत्र पहिचान गरिएका छन् । तिनलाई कसरी निस्तेज पार्ने भन्ने सन्दर्भमा पनि छलफल हुनेछ,’ एक अधिकारीले भने ।

गौरव कान्तिपुर मिडिया ग्रुपका सुरक्षा संवाददाता हुन् । उनी राष्ट्रिय सुरक्षा मामिला, सुशासन र समसामयिक विषयमा रिपोर्टिङ गर्छन् ।