फाल्गुनन्द गाउँपालिका–६ का ४५ वर्षीय लोकबहादुर मोक्तानले ७६ वर्षीय मनबहादुरमाथि खुकुरी प्रहार गरेको प्रहरीले जनाएको छ।
पाँचथर — पाँचथरमा बुबामाथि खुकुरी प्रहार गर्ने छोरा पक्राउ परेका छन् ।
पाँचथर प्रहरीले फाल्गुनन्द गाउँपालिका–६ छयागुका ४५ वर्षीय लोकबहादुर मोक्तानलाई पक्राउ गरेको हो ।
लोकबहादुरले शुक्रबार साँझ ७६ वर्षीय मनबहादुर मोक्तानमाथि खुकुरी प्रहार गरी घाइते बनाएका थिए ।
प्रहरीका अनुसार मादक पदार्थ सेवन गरेका लोकबहादुरले सामान्य विवादमा बुबामाथि खुकुरी प्रहार गरेका थिए । टाउकोमा गहिरो चोट लागेका मनबहादुरको जिल्ला अस्पताल पाँचथरमा उपचार भइरहेको छ । उनको अवस्था मध्यम छ ।
लोकबहादुरलाई नियन्त्रणमा लिएर जिल्ला प्रहरी कार्यालयमा राखी अनुसन्धान सुरु गरिएको जिल्ला प्रहरी कार्यालय पाँचथरका प्रहरी नायब उपरीक्षक अनिषकुमार कर्णले जानकारी दिए ।
लक्ष्मी गौतम कान्तिपुरका पाँचथर संवाददाता हुन् ।
