एएफसी अध्यक्ष शेख सलमानको समर्थनपछि एसियाली फुटबल इन्फान्टिनोको पक्षमा उभिएको छ, जसले आगामी मार्चको निर्वाचनमा उनको स्थिति मजबुत बनाएको छ।
काठमाडौँ — फिफा अध्यक्ष जियानी इन्फान्टिनो चौथो कार्यकालका लागि पुनः निर्वाचित हुने सम्भावना बलियो बनेको छ । एसियाली फुटबल महासंघ (एएफसी) का अध्यक्ष शेख सलमान बिन इब्राहिम अल खलिफाले उनको उम्मेदवारीलाई समर्थन गरेपछि इन्फान्टिनोको पक्षमा समर्थन बढेको हो ।
शुक्रबार जापानको टोकियोमा आयोजित एएफसीको विशेष कंग्रेसमा शेख सलमानले एसियाली फुटबल इन्फान्टिनोको पक्षमा एकजुट रहेको बताएका थिए ।
यसअघि फिफाको व्यावसायिक अधिकारमा निजी लगानी भित्र्याउने प्रस्तावको विषयमा शेख सलमानसहित युरोपेली फुटबल महासंघ (यूईएफए) का अध्यक्ष अलेक्जेन्डर सेफेरिन र उत्तर तथा मध्य अमेरिकी फुटबल महासंघ (कन्काकाफ) का प्रमुख भिक्टर मोन्टाग्लियानीले इन्फान्टिनोको आलोचना गरेका थिए ।
उक्त प्रस्तावलाई लिएर विवाद चर्किएपछि इन्फान्टिनोको नेतृत्वमाथि प्रश्न उठेको थियो । तर, एएफसीको पछिल्लो समर्थनले आगामी मार्चमा हुने फिफा अध्यक्षको निर्वाचनमा उनलाई चुनौती दिन अन्य उम्मेदवारका लागि बाटो कठिन बनेको छ ।
यसअघि अफ्रिकी फुटबल महासंघका ५४ सदस्य राष्ट्रको समर्थन पनि इन्फान्टिनोले प्राप्त गरिसकेका छन् ।
विनयज्योति सापकोटा कान्तिपुर टेलिभिजनका खेलकूद संवाददाता हुन् ।
