बडादसैँको चौथो दिन पनि धनकुटामा टीका–जमरा लगाएर दसैँ मनाउने क्रम जारी छ। टीका–जमरा र आशीर्वाद थाप्न आफन्त तथा मान्यजनको घरमा जाने–आउनेको चहलपहल बढेको छ।
धनकुटा — बडादसैँको चौथो दिन पनि धनकुटामा टीका–जमरा लगाएर दसैँ मनाउने क्रम जारी छ। टीका–जमरा र आशीर्वाद थाप्न आफन्त तथा मान्यजनको घरमा जाने–आउनेको चहलपहल बढेको छ।
बिहानैदेखि आफन्त तथा मान्यजनकहाँ पुगेर टीका–जमरा लगाउने र आशीर्वाद लिने क्रम चलिरहेको छ। टाढाटाढाका गाउँघरमा रहेका आफन्तकहाँ पुगेर दसैँ मनाएकाहरू फर्किन थालेका छन् भने कतिपय अझै आफन्त तथा मान्यजनकहाँ टीका–जमरा थाप्न जाने क्रममै छन्।
दसैँका कारण सार्वजनिक यातायातमा यात्रुको चाप बढेको छ। सवारीसाधनमा भीड बढेपछि यात्रुहरूले पालो पर्खेर यात्रा गर्नुपर्ने अवस्था छ। केही समय पर्खनुपरे पनि आफन्तसँग भेटघाट गरी दसैँ मनाउने क्रम नरोकिएको यात्रुहरू बताउँछन्।
महालक्ष्मी नगरपालिका–९, मूर्तिढुङ्गाका लक्ष्मण सुवेदीले दसैँमा आफन्तसँग भेटघाट गर्न जाने–आउने क्रम बढेसँगै सार्वजनिक यातायातमा यात्रुको चाप बढेको बताए।
त्यस्तै, धनकुटा नगरपालिका–६, आत्माराका शेखर बरालले यात्रा केही असहज भए पनि दसैँको टीका–जमरा लगाउने र आफन्तसँग खुसी साटासाट गर्ने उत्साह कायम रहेको बताए।
टीका–जमरा लगाउने, मान्यजनबाट आशीर्वाद लिने र परिवार तथा आफन्तसँग भेटघाट गर्ने क्रमले धनकुटामा दसैँको रौनक बढाएको छ। सार्वजनिक यातायातमा यात्रुको चाप देखिए पनि चाडपर्व मनाउन घरपरिवार र आफन्तसँग भेटघाट गर्ने क्रम जारी छ।
विनोद घिमिरे कान्तिपुर संवाददाता हुन्।
