करिब तीन करोड २५ लाख रुपैयाँ लागतको चलचित्र ‘छ माया छपक्कै २’ दसैँको अवसर पारेर फूलपातीदेखि प्रदर्शनमा आएको छ। तर यस्तो समयमा धेरै जस्तो निर्माता आफ्नो लगानीलाई लिएर चिन्तित देखिन्छन् भने चलचित्रलाई चलाउनका लागि अनेकौँ दाउ अपनाउने गर्दछन्।
तर यस पटक भने अभिनेता तथा निर्माता दीपक राज गिरीको चलचित्र ‘छ माया छपक्कै २’ चल्नै पर्ने दबाबबाट मुक्त भएको उनले स्वीकारेका छन्। उनले एक अन्तर्वार्तामा भने, ‘यो मेरो मास्टर प्रोडक्ट होइन। ‘छक्का पन्जा’ भएको भए, ओहो मेरो छक्का पन्जा चलेन भने के गर्ने हुन्थ्यो। अहिलेको जुन ‘छ माया छपक्कै २’ हो यसअघिको श्रृंखला दर्शकले मन पराउनु भएको थियो। यस पटक पनि दर्शकले मन पराउनु हुने छ।’ जस कारण यसको दोस्रो श्रृंखलालाई लिएर गिरी तनावमुक्त देखिएका छन्।
चलचित्र विकास बोर्ड अनुसार यसअघिको ‘छ माया छपक्कै’ ले नौ करोड बढी रुपैयाँको कलेक्सन गरेको थियो।
प्रकाशित: ६ कार्तिक २०८३ १३:२३ शुक्रबार
