सुनसरीको धरानबाट प्रहरीले ४९९ किलो गाँजासहित भारतीय नम्बर प्लेटको स्कार्पियो बरामद गरेको छ । गाँजा ओसारपसारमा संलग्न रहेको आरोपमा प्रहरीले स्कार्पियो चालकलाई पक्राउ गरेको छ ।
सुनसरी — सुनसरीको धरानबाट प्रहरीले ४९९ किलो गाँजासहित भारतीय नम्बर प्लेटको स्कार्पियो बरामद गरेको छ । गाँजा ओसारपसारमा संलग्न रहेको आरोपमा प्रहरीले स्कार्पियो चालकलाई पक्राउ गरेको छ ।
जिल्ला प्रहरी कार्यालय सुनसरीका अनुसार शनिबार राति ११:३० बजे धरान उपमहानगरपालिका–८ स्थित सेउती पुलमा सवारीसाधन जाँच गर्ने क्रममा BR 11 Y 3039 नम्बरको स्कार्पियोबाट गाँजा बरामद गरिएको सुनसरी प्रहरीका सूचना अधिकारी तथा प्रहरी नायब उपरीक्षक चन्द्रबहादुर खड्काले जानकारी दिए ।
पक्राउ पर्नेमा मोरङको विराटनगर महानगरपालिका–१३ का ३२ वर्षीय अजयकुमार साह छन् । इलाका प्रहरी कार्यालय, वडा प्रहरी कार्यालय र अस्थायी प्रहरी चौकी तिनकुने धरानबाट खटिएको संयुक्त प्रहरी टोलीले उनलाई नियन्त्रणमा लिएको हो ।
प्रहरी नायब उपरीक्षक खड्का अनुसार बरामद गाँजा र स्कार्पियोसहित चालकलाई नियन्त्रणमा लिएर थप अनुसन्धान भइरहेको छ ।