फिनल्यान्डको रक्षा बलका अनुसार रुसको गोगल्यान्ड टापुको पश्चिममा रहेको अन्तर्राष्ट्रिय जलक्षेत्रमा जहाजमाथि आक्रमण भएको हो
काठमाडौँ — बाल्टिक सागरमा शनिबार रुसी सेनाको एक कार्गो जहाजमा ड्रोन आक्रमण हुँदा आगलागी भएको छ । उक्त आक्रमण युक्रेनले गरेको हुनसक्ने फिनल्यान्डको आशंका छ । आक्रमणपछि 'स्पार्टा–२' नामक उक्त जहाज बग्दै फिनल्यान्डको जलक्षेत्रमा प्रवेश गरेको थियो ।
जहाजमा सवार १६ जना चालक दलका सदस्यहरू लाइफबोटमार्फत नजिकैको अर्को रुसी जहाजमा सरेर सुरक्षित रूपमा रुस फर्किरहेका छन् । रुसको उत्तरपश्चिमी लेनिनग्राद क्षेत्रमा युक्रेनले ड्रोन आक्रमण तीव्र पारेसँगै नेटो राष्ट्रहरूको सीमामा समेत युद्धको त्रास बढेको छ ।
फिनल्यान्डको रक्षा बलका अनुसार रुसको गोगल्यान्ड टापुको पश्चिममा रहेको अन्तर्राष्ट्रिय जलक्षेत्रमा उक्त जहाजमाथि आक्रमण भएको हो । आगो निभाउने कार्य जारी रहेकाले फिनल्यान्डले उद्धार कार्यको नेतृत्व गरिरहेको छ । यसैक्रममा एक रुसी हेलिकप्टरले फिनल्यान्डको हवाई क्षेत्र उल्लंघन गरेको आशंका समेत गरिएको छ ।
घटनापछि पूर्वी गल्फ अफ फिनल्यान्डमा अस्थायी हवाई तथा सामुद्रिक प्रतिबन्ध लगाइएको छ । नेटोको सुरक्षाका लागि स्विडेनका लडाकु विमानहरू परिचालन गरिएका छन् भने इस्टोनियाले उद्धार तथा प्रदूषण नियन्त्रणका लागि जलसेनाको जहाज पठाएको छ । यसबारे युक्रेनले तत्काल कुनै प्रतिक्रिया दिएको छैन ।