शनिबार साँझ ५:३० बजिसक्दा त्रिवि अन्तर्राष्ट्रिय क्रिकेट मैदानमा एनपिएलको फाइनल प्रतिस्पर्धाले माहोल तातिसकेको थियो । दर्शक आफूले समर्थन गरेको समूहको समर्थनमा हुटिङ गरिरहेका थिए तर अछामका शिवराज विष्ट भने त्यतिबेलासम्म टिकटको पर्खाइमै हुनुहुन्थ्यो । उहाँ कसैसँग टिकट छ कि भन्दै सोधिरहनुभएको थियो । “अनलाइनबाट टिकट एकैछिन सकियो भनेर बन्द गरियो तर बाहिर महँगोमा टिकट बिक्री भइरहेको छ, हामीले भने टिकट पाएनौँ ।” विष्टले गुनासो गर्नुभयो ।
यस्तै पाल्पाका सुरज पन्थले पनि एनपिएलको फाइनल खेल हेर्ने टिकट नपाएको गुनासो गर्नुभयो । नेपाल क्रिकेट सङ्घ (क्यान) ले उचित ध्यान दिन नसक्दा आफूहरू फाइनल हेर्नबाट वञ्चित भएको उहाँले गुनासो गर्नुभयो । यस्तै टिकट पाएका दर्शकले पनि मैदानभित्र प्रवेश गर्न झन्झटिलो प्रक्रिया अपनाइएको भन्दै गुनासो गर्नुभएको छ । “टिकट लिएर गेटमा आइसक्यौँ फेरि छाप लगाएर आउन भनेर फर्काइयो, क्यानको व्यवस्थापनले यसमा ध्यान दिन सकेन,” परिवारसहित एनपिएल हेर्न आउनुभएका दर्शक सर्वजित थापाले भन्नुभयो । एक महिना लामो नेपाली क्रिकेटको महाकुम्भमा फाइनल हेर्न चाहेका धेरै दर्शकले टिकट नै पाएनन् ।
Read full story at source ( gorkhapatraonline.com )