३१ खेलको रोमाञ्चक यात्रा पार गरिसकेको यस सिजनको एनपीएलले शनिबार साबिक विजेता लुम्बिनी लायन्स र तेस्रो सिजन नै फाइनल पुगेको सुदूरपश्चिम रोयल्स उपाधिका लागि आमनेसामने हुँदै छन् ।
काठमाडौँ — नेपाल प्रिमियर लिग अब उपाधिको अन्तिम मोडमा छ । ३१ खेलको रोमाञ्चक यात्रा पार गरिसकेको यस सिजनको एनपीएलले शनिबार साबिक विजेता लुम्बिनी लायन्स र तेस्रो सिजन नै फाइनल पुगेको सुदूरपश्चिम रोयल्स उपाधिका लागि आमनेसामने हुँदै छन् । टिमको सफलता र उपाधि प्रतिस्पर्धासँगै व्यक्तिगत पुरस्कारको दौड पनि उत्तिकै रोचक छ । यस संस्करणको सर्वोत्कृष्ट नेपाली खेलाडीले कार पाउँदा उत्कृष्ट र उदीयमान खेलाडीले मोटरसाइकल प्राप्त गर्नेछन् । त्यसो भए, यसपालि कार र मोटरसाइकलका बलिया दाबेदार को–को हुन् त ?
नेपाली खेलाडीको प्रदर्शन आधार मान्दा कारका बलिया दाबेदारमध्ये सबैभन्दा अगाडि देखिन्छन्, चितवन राइनोजका रिजन ढकाल । १७ विकेट लिएका रिजनले ८ इनिङ्समा २७ ओभर बलिङ गर्दै ६.२ को इकोनोमीमा मात्र १६८ रन खर्चिएका छन् । इलिमिनेटरमा काठमान्डु गोर्खाजविरुद्ध १६ रन दिएर ४ विकेट लिनु उनको टी–२० करियरकै उत्कृष्ट प्रदर्शन हो । चितवन उपाधि दौडबाट बाहिरिए पनि व्यक्तिगत प्रदर्शनका आधारमा रिजनको दाबेदारी कमजोर छैन । विगतका संस्करणमा ब्याटरले मात्र कार जितेको इतिहास हेर्दा कम्तीमा मोटरसाइकल भने उनीबाट कसैले खोस्न सक्ने देखिँदैन ।
सुदूरपश्चिमका कप्तान दीपेन्द्रसिंह ऐरीको प्रदर्शनले कारको प्रतिस्पर्धा रोचक बनाएको छ । ९ इनिङ्समा ३ अर्धशतकसहित २१७ रन बनाएका दीपेन्द्रले बलिङमा पनि ५.२९ को इकोनोमीमा ६ विकेट लिएका छन् । उत्कृष्ट अलराउन्डर दीपेन्द्रले फाइनलमा पनि आफ्नो लय कायम राख्दै सुदूरपश्चिमलाई उपाधि दिलाउन सके कारको दाबेदारीमा उनलाई उछिन्न कठिन हुनेछ । पहिलो संस्करणमा पनि उनले कार जितेका थिए । विराटनगर किंग्सका लोकेश बम पनि बलिया प्रतिस्पर्धी हुन् । ७ खेलमा ३४.५७ को औसत र १४२ माथिको स्ट्राइक रेटमा २४२ रन बनाएका लोकेश सर्वाधिक रन बनाउने नेपाली खेलाडी तथा समग्रमा दोस्रो स्थानमा छन् । १६ चौका र १८ छक्का प्रहार गरेका उनको आक्रामक ब्याटिङले प्रतियोगितामा छुट्टै रोमाञ्च थप्यो । कारको दौडमा पछि परे मोटरसाइकलका लागि उनको दाबेदारी बलियो छ ।
उदीयमान खेलाडी पुरस्कारका लागि जनकपुर बोल्ट्सका तीव्र गतिका बलर राहुल यादव बलिया दाबेदार हुन् । ट्यालेन्ट हन्टमार्फत जनकपुरमा आबद्ध राहुलले ७ खेलमा ६.८६ को इकोनोमीमा १२ विकेट लिएका छन् । काठमान्डुविरुद्ध ३१ रन खर्चेर ४ विकेट लिनु उनको उत्कृष्ट प्रदर्शन हो । लगातार दुई सिजन पुछारमा रहेर लिग टुंग्याएको जनकपुरबाट राहुलजस्ता प्रतिभालाई अवसर दिनु यस संस्करणको सकारात्मक पक्ष बनेको छ ।
सुदूरपश्चिमका बायाँहाते स्पिनर अनिल खरेल पनि उदीयमान खेलाडीको पुरस्कारका दाबेदार हुन् । टोलीलाई फाइनलसम्म पुर्याउने क्रममा उनले ९ खेलको ७ इनिङ्समा १० विकेट लिएका छन् । फाइनलमा प्रभावशाली प्रदर्शन गर्न सके मोटरसाइकल उनको हुनसक्छ । लुम्बिनीका अभिषेक गौतमले ५ खेलमा ७ विकेट लिएर टोलीलाई उपाधिसामु पुर्याउन महत्त्वपूर्ण भूमिका खेलेका छन् । कर्णाली याक्सका युनिशविक्रम सिंह ठकुरी र विराटनगरका इमरान शेखले पनि युवा प्रतिभाका रूपमा आफ्नो उपस्थिति देखाएका छन् ।
आज शनिबार कीर्तिपुर रंगशालामा हुने फाइनलले उपाधि छिनोफानो मात्र गर्ने छैन, व्यक्तिगत पुरस्कारको दौडलाई पनि पूर्णविराम लगाउने छ ।
सुबास रोकाया कान्तिपुर टिभीका संवाददाता हुन् ।