किङ योगीको लेखन तथा निर्देशनमा बन्ने फिल्मको प्रि–प्रोडक्सन हैदराबाद र बैंगलोरमा भइरहेको छ भने छायांकन २०८४ असारदेखि सुरु हुनेछ ।
काठमाडौँ — नेपाल र भारतका फिल्मकर्मीहरूको सहकार्यमा फिल्म ‘मोनालिसा ब्लडी लभ ’ बन्ने भएको छ ।
फिल्मको फर्स्ट लुक पनि निर्माण टिमले केही दिनअघि सार्वजनिक गरेको थियो । किङ योगीको लेखन तथा निर्देशनमा बन्न लागेको फिल्ममा सचित खड्का कार्यकारी निर्माता छन् । पिजी स्टुडियोको प्रस्तुति रहने फिल्मलाई प्रशान्त गिरीले निर्माण गर्नेछन् ।
कार्यकारी निर्माता खड्काका अनुसार फिल्ममा भारतका विभिन्न प्रतिष्ठित निर्माण संस्था, प्रोडक्सन हाउस र अनुभवी प्राविधिक टोलीहरूको सहकार्य रहनेछ ।
फिल्मको प्रि–प्रोडक्सन भारतको हैदराबाद र बैंगलोरमा भइरहेको छ। फिल्मको छायांकन ०८४ असारदेखि सुरु गर्ने तयारी रहेको खड्काले बताए ।
उनका अनुसार फिल्मको ३० प्रतिशत छायांकन नेपालमा र ७० प्रतिशत भारतमा हुनेछ । फिल्ममा नेपाल र भारत दुवै देशका कलाकारहरूको अभिनय रहनेछ।
‘भारतका केही चर्चित कलाकारसँगै नेपाली कलाकारको पनि सहभागिता रहनेछ । कलाकारहरूको नाम भने औपचारिक रूपमा सार्वजनिक गरिएको छैन,' उनले भने ।
फिल्मलाई नेपाली र हिन्दी भाषासहित पाँचवटा भाषामा प्रदर्शन गर्ने तयारी भइरहेको पनि उनले बताए ।