चिनियाँ सरकारी समाचार संस्था सिन्ह्वाका अनुसार घाइतेमध्ये ११ जनाको अवस्था गम्भीर छ।
काठमाडौँ — चीनको दक्षिणपश्चिमी क्षेत्र तिब्बतमा बिहीबार राति ७ म्याग्निच्युडको शक्तिशाली भूकम्प जाँदा कम्तीमा १६ जनाको मृत्यु भएको छ भने ३२ जना घाइते भएका छन्।
चिनियाँ सरकारी समाचार संस्था सिन्ह्वाका अनुसार घाइतेमध्ये ११ जनाको अवस्था गम्भीर छ।
चीनको भूकम्प सञ्जाल केन्द्रका अनुसार स्थानीय समयअनुसार बिहीबार राति १० बजेर ३३ मिनेटमा भूकम्प गएको हो। यसको केन्द्रविन्दु उत्तरी तिब्बतको नाग्छु क्षेत्रमा रहेको एक उच्च हिमाली काउन्टीमा थियो। भूकम्पको केन्द्रविन्दु जमिनको सतहबाट १० किलोमिटर गहिराइमा रहेको थियो।
भूकम्पको केन्द्रविन्दु आसपासका गाउँमा केही घरका भित्तामा चिरा परेको छ। स्थानीय सञ्चारमाध्यमले सार्वजनिक गरेका दृश्यमा मानिसहरू घरबाट बाहिर निस्केर सडकमा तथा गाडीभित्र आश्रय लिइरहेको देखिन्छ।
भूकम्प प्रभावित क्षेत्रमा उद्धार तथा अग्नि नियन्त्रण टोली परिचालन गरिएको सरकारी सञ्चारमाध्यमले जनाएका छन्। भूकम्पपछि आसपासका क्षेत्रमा ३ देखि ४ म्याग्निच्युडका परकम्पसमेत गएका छन्।
समुद्री सतहबाट औसत ४ हजार ८६४ मिटर उचाइमा रहेको भूकम्पको केन्द्रविन्दु तिब्बतको राजधानी ल्हासाबाट करिब ४०० किलोमिटर टाढा छ।
यो सन् २०२४ को जनवरीयता चीनमा गएको सबैभन्दा शक्तिशाली भूकम्प हो।
