रास्वपा प्रवक्ता जगदीश खरेलले निर्वाचन आयोग, राजनीतिक दल, सरकार तथा अन्य सरोकारवालाबीच बृहत् छलफल गरेर मात्रै निर्वाचनको विषयमा निष्कर्ष निकाल्नुपर्ने बताएका छन् ।
काठमाडौँ — सत्तारुढ दल राष्ट्रिय स्वतन्त्र पार्टी (रास्वपा) ले प्रदेश र स्थानीय तहको निर्वाचन एकैपटक गर्ने वा छुट्टाछुट्टै गर्ने भन्ने विषयमा बृहत् छलफलपछि मात्रै निष्कर्षमा पुग्ने जनाएको छ ।
शुक्रबार निर्वाचन आयोगले स्थानीय तहको निर्वाचनका विषयमा राजनीतिक दलका शीर्ष नेताहरूसँग छलफल गरिरहेको छ । रास्वपाका प्रवक्ता एवं सांसद जगदीश खरेलले सञ्चारकर्मीसँग आयोगले राखेको छलफलमा स्थानीय तह र प्रदेशको निर्वाचन सँगै गराउने वा छुट्टाछुट्टै गर्ने भन्ने विषयका दुवै पक्षका फाइदा र बेफाइदाबारे बहस हुने बताए । आयोग, राजनीतिक दल, सरकार तथा अन्य सरोकारवालाबीच बृहत् छलफल गरेर मात्रै निर्वाचनको विषयमा निष्कर्ष निकाल्नुपर्ने उनको भनाइ थियो ।
‘पहिले निर्वाचन आयोग र विभिन्न राजनीतिक दलका तर्फबाट धारणा आउँछ । स्थानीय तह र प्रदेशको निर्वाचन छुट्टाछुट्टै गर्ने कि सँगै गर्ने, सँगै गर्दा के फाइदा र बेफाइदा छन् भन्ने विषयमा वृहत छलफल गर्छौं,’ उनले भने ।
शुक्रबारको छलफल प्रारम्भिक चरणको मात्रै भएकाले यसैबाट रास्वपाको आधिकारिक धारणा तय नहुने उनको भनाइ थियो ।