अस्पतालका प्रवक्ता डा. रामप्रसाद सापकोटाका अनुसार मंगलबार मात्रै ओपीडीमा ३ हजार ३०० बिरामीले सेवा लिएका छन् ।
नारायणगढ चितवन — दसैं–तिहार र छठ पर्वको लामो बिदापछि भरतपुर अस्पतालमा उपचारका लागि आउने बिरामीको चाप बढेको छ । अस्पतालको बहिरङ्ग सेवा (ओपीडी) सञ्चालनमा आएसँगै बिरामीको सङ्ख्या बढेको हो ।
अस्पतालका प्रवक्ता डा. रामप्रसाद सापकोटाका अनुसार मंगलबार मात्रै ओपीडीमा ३ हजार ३०० बिरामीले सेवा लिएका छन् । लामो बिदाका कारण निजी अस्पताल तथा क्लिनिक पनि बन्द वा सीमित रूपमा सञ्चालन भएकाले सरकारी अस्पतालमा बिरामीको चाप बढेको उनले बताए । बुधबार पनि अस्पतालमा बिरामीको चाप अत्यधिक रहेको उनको भनाइ छ ।
उनका अनुसार गत वर्ष २०८२ को कात्तिकमा आकस्मिक, स्वास्थ्य बीमा र सामान्य टिकटमार्फत २९ हजार ४२२ जनाले सेवा लिएकामा यस वर्ष सोही अवधिमा ३९ हजार २०० जनाले सेवा लिएका छन् ।
गत वर्ष असोजमा २९ हजार २८१ जनाले सेवा लिएका थिए । यस्तै, गत वर्ष कात्तिकमा आकस्मिक सेवामा ६ हजार २५९ बिरामी आएकामा यस वर्ष उक्त सङ्ख्या बढेर ७ हजार ४९५ पुगेको छ ।
अस्पतालमा आउने बिरामीमध्ये करिब ६० देखि ७० प्रतिशतले स्वास्थ्य बीमामार्फत सेवा लिने गरेका छन् । ओपीडीमा सबैभन्दा बढी चाप मेडिसिन र अर्थोपेडिक्स विभागमा रहेको प्रवक्ता सापकोटाले बताए ।
आन्तरिक मेडिसिन विभागमा दैनिक ३०० देखि ४०० जनासम्म बिरामी आउने गरेका छन् । कहिलेकाहीँ यो सङ्ख्या ५०० देखि ६०० सम्म पुग्ने गरेको उनले जानकारी दिए ।
निजी अस्पतालको तुलनामा सरकारी अस्पतालमा उपचार खर्च कम हुनु, स्वास्थ्य बीमाको सुविधा उपलब्ध हुनु र अस्पतालले प्रदान गर्ने सेवाप्रति बिरामीको विश्वास बढ्नुले पनि बिरामीको आकर्षण बढेको उनको भनाइ छ ।