पहिलो पावर प्लेमा २० रनमै सीमित भएको सुदूरपश्चिमलाई दीपेन्द्रको अर्धशतकले सम्हाले पनि टोली १०५ रनमै रोकियो।
काठमाडौँ — कप्तान दीपेन्द्रसिंह ऐरीले अर्धशतक बनाए पनि सुदूरपश्चिम रोयल्सले नेपाल प्रिमियर लिग (एनपीएल) क्रिकेटको क्वालिफायर १ मा लुम्बिनी लायन्सलाई १ सय ६ रनको मात्र लक्ष्य दिएको छ ।
दीपेन्द्रले ५२ रन बनाए पनि टस हारेपछि ब्याटिङको निम्तो पाएको सुदूरपश्चिमले त्रिवि अन्तर्राष्ट्रिय क्रिकेट रंगशाला, कीर्तिपुरमा निर्धारित २० ओभर खेली ८ विकेट गुमाई १ सय ५ रन बनाएको थियो । दीपेन्द्रले १८ औं ओभरमा खेलको एकमात्र छक्का प्रहार गरेका थिए । शेर मल्लको बलमा उनले रिभर्स स्विपमा उक्त छक्का प्रहार गरेका थिए ।
दीपेन्द्रले ५१ बलको इनिङ्समा ३ चौका पनि प्रहार गरे । खेलको अन्तिम ओभरमा किशोर महतोको बलमा दीपेन्द्रले हावामा क्याच दिन पुगेपछि आउट भएका थिए । खेलको दौरान क्र्याम्प भएपछि दीपेन्द्रले उपचारका लागि समय लिनु परेको थियो ।
सुदूरपश्चिमले निकै दयनीय सुरुआत गरेको थियो । रुबेन ट्रम्पलमनले खेलको पहिलो बलमै जर्ज मुन्सीलाई बोल्ड गरेका थिए । भेट्रान स्कटिस ब्याटर मुन्सीको यस सिजनको प्रतियोगितामा यो उनको पहिलो खेल थियो । गत वर्ष उनले विराटनगर किंग्सबाट खेलेका थिए ।
नामिबियाका प्रभावशाली अलराउन्डर ट्रम्पलमनले खेलको तेस्रो तथा आफ्नो अर्को ओभरमा श्रीलंकाली ब्याटर थानुका दवारेलाई ३ रनमा आउट गरे । थानुकाको पनि प्रतियोगितामा यो पहिलो खेल थियो । चौथो ओभरको पहिलो बलमै अभिशेष गौतमले विनोद भण्डारीलाई ३ रनमा आउट गरे ।
विकेटसँगै निरन्तर दबाबपछि सुदूरपश्चिमले ६ ओभरको पहिलो पावर प्लेमा २० रनमात्र बनाउन सकेको थियो, जुन यस सिजनको एनपीएलको पहिलो पावर प्लेमा सबैभन्दा कम स्कोर हो । काठमान्डु गोर्खाजविरुद्धको यसअघिको खेलमा पनि सुदूरपश्चिमले ६ ओभरको पहिलो पावर प्लेमा २१ रनमात्र बनाउन सकेको थियो ।
दीपेन्द्र र इशान पाण्डेले सुदूरपश्चिमको इनिङ्सलाई उकास्ने प्रयास गरिरहे पनि टोलीले पहिलो १० ओभरमा ४० रनमात्र जोड्न सकेको थियो । दीपेन्द्र र इशानले दोस्रो विकेटमा ६४ रनको साझेदारी गरे । विकेटकिपर निरोशन डिकवेलाको सिधा थ्रोमा रनआउट हुनुअघि इशानले ३३ बल खेली ३ चौका प्रहार गर्दै २७ रन बनाए ।
थारिन्दु रथ्नायके १, आरिफ शेख ४ रनमै आउट भए । इनिङ्सको अन्तिम बलमा रनआउट भएका स्कट कुग्लेनले ७ रन जोडे । अनिल खरेल २ रनमा अविजित रहे ।
च्याम्पियन लुम्बिनीबाट ट्रम्पलमन र शेर मल्लले २–२ विकेट लिए । ट्रम्पलमनले ४ ओभरमा १४ र शेरले ४ ओभरमा २७ रन खर्चे । अभिशेषले ४ ओभरमा ११ र किशोरले १९ रनमात्र खर्चेर १–१ विकेट लिए ।
यी दुई टोली फाइनलमा स्थान पाउन प्रतिस्पर्धा गरिरहेका हुन् । यी दुई टोली राउन्ड रोबिन लिगको शीर्ष दुई स्थानमा रहेका थिए । यो खेल जित्ने टोली फाइनल पुग्नेछ ।
विनोद पाण्डे कान्तिपुरका खेलकुद ब्यूरो प्रमुख हुन् ।