पीडित पक्ष र सरकारले गठन गरेको दुर्घटना छानबिन समितिबीच सहमति भएपछि पोस्टमार्टम र शव बुझाउने प्रक्रिया अघि बढेको हो।
मकवानपुर — मकवानपुरको भीमफेदी गाउँपालिका–६ चिसापानीगढीमा भएको माइक्रोबस दुर्घटनामा मृत्यु भएका सर्लाहीको चक्रघट्टा गाउँपालिका–४ सुन्दरपुरका १३ जनाको आजै सामूहिक दाहसंस्कार गरिने भएको छ। पीडित पक्ष र सरकारले गठन गरेको दुर्घटना छानबिन समितिबीच सहमति भएपछि पोस्टमार्टम र शव बुझाउने प्रक्रिया अघि बढेको हो।
मधेस प्रदेशसभा सदस्य तथा पूर्वअर्थमन्त्री सञ्जयकुमार यादवका अनुसार १३ जनाको शव एकै स्थानमा सामूहिक रूपमा दाहसंस्कार गर्ने तयारी गरिएको छ। उनकै नेतृत्वमा सर्लाहीबाट हेटौँडा आएको टोलीले मृतकको रीतिरिवाजअनुसार अन्तिम संस्कार गर्न आवश्यक प्रक्रिया र तयारी अघि बढाएको छ।
यसअघि मृतकका आफन्तले पीडित परिवारलाई जनही १० लाख रुपैयाँ क्षतिपूर्ति दिनुपर्ने, परिवारका सदस्यलाई रोजगारीको व्यवस्था गर्नुपर्ने तथा घाइतेको उपचार खर्च सरकारले व्यहोर्नुपर्ने माग राख्दै शव बुझ्न अस्वीकार गरेका थिए।
मकवानपुरका सहायक प्रमुख जिल्ला अधिकारी शेषकान्त पौडेलका अनुसार पीडित पक्ष र छानबिन समितिबीच कानुनबमोजिम प्राप्त हुने राहत तथा क्षतिपूर्ति तत्काल उपलब्ध गराउन सरकारले पहल गर्ने सहमति भएको छ। थप राहत तथा क्षतिपूर्तिका लागि जिल्ला प्रशासन कार्यालय मकवानपुरले प्रधानमन्त्री तथा मन्त्रिपरिषद्को कार्यालयलाई आग्रह गर्ने सहमति भएको छ।
सहमतिपछि पोस्टमार्टम हुन बाँकी नौ जनाको शव परीक्षण प्रक्रिया अघि बढाइएको छ। हेटौँडा अस्पतालले पोस्टमार्टमका लागि आवश्यक प्रक्रिया पूरा गरिसकेको छ। पोस्टमार्टमपछि आजै शव आफन्तलाई बुझाउने तयारी गरिएको छ।
सुवास विडारी कान्तिपुरका मकवानपुर संवाददाता हुन् ।
