कीर्तिपुरस्थित त्रिवि क्रिकेट मैदानमा जारी नेपाल प्रिमियर लिग (एनपीएल) को २२औं खेलमा पोखरा एभेन्जर्सले प्रस्तुत गरेको १३३ रनको लक्ष्य पछ्याइरहेको विराटनगर किंग्सले आधा इनिङ सकिँदा ३ विकेट गुमाएर संघर्ष गरिरहेको छ। ताजा स्थितिमा विराटनगरले ११.२ ओभरमा ३ विकेट गुमाउँदै ६५ रन बनाएको छ।
क्रिजमा बसिर अहमद १७ रन र एन्जेलो म्याथ्युज २ रन बनाएर खेलिरहेका छन्।
यसअघि राम्रो लयमा देखिएका विकेटकिपर ब्याटर लोकेश बम १०औं ओभरको सुरुवातमै कुशल भुर्तेलको बलमा बोल्ड भए। उनले २७ बलमा २ चौका र २ छक्का प्रहार गर्दै ३३ रनको महत्वपूर्ण योगदान दिए। ५६ रनको कुल स्कोरमा लोकेश आउट भएपछि विराटनगरमाथि थप दबाब बढेको छ।
विराटनगरले यसअघि १.४ ओभरमा ओपनर इमरान शेखलाई १० रन र ३.१ ओभरमा चरिथ असालंकालाई शून्य रनमै गुमाएको थियो। पोखराका लागि कसिलो बलिङ गरेका कुशल भुर्तेलले २.२ ओभरमा १ मेडनसहित ८ रन खर्चेर १ विकेट लिए।
त्यस्तै विपिन खत्रीले २ ओभरमा ९ रन र रमेश मेन्डिसले २ ओभरमा १५ रन दिएर समान १-१ विकेट हात पारे। सागर ढकालले ४ ओभर बलिङ गर्दै २२ रन खर्चिए।
यसअघि पहिले ब्याटिङ गरेको पोखरा १७.५ ओभरमा १३२ रनमा अलआउट भएको थियो। पोखरालाई सस्तैमा समेट्न विराटनगरका कप्तान सन्दीप लामिछानेले ४ ओभरमा २७ रन खर्चेर ह्याट्रिकसहित ६ विकेट लिएका थिए।
पोखराका युवराज साम्राले ८४ रनको अर्धशतकीय इनिङ खेलेका थिए।
प्रकाशित: २६ कार्तिक २०८३ १५:२१ बिहीबार
