चार वर्षअघि गरुडा नगरपालिका–५ महम्मदपुरबाट सुरु भएको युवाको अभियान अहिले रौतहटका विभिन्न नगरपालिका, बजार र विद्यालयसम्म विस्तार भएको छ ।
रौतहट — लागुऔषध दुर्व्यसनले युवा पुस्तालाई गाँज्दै लगिरहेका बेला यसको नियन्त्रण र न्यूनीकरणका लागि रौतहटका युवाहरूले निरन्तर जनचेतनामूलक अभियान सञ्चालन गर्दै आएका छन् । लागुऔषधको जोखिमबारे युवादेखि अभिभावकसम्मलाई सचेत गराउने उद्देश्यले सुरु गरिएको अभियानले पछिल्लो समय जिल्लाका विभिन्न नगरपालिका, बजार, गाउँ तथा विद्यालयसम्म आफ्नो पहुँच विस्तार गरेको छ ।
जेन-जी आन्दोलनपछि जेनन्जी नेपाल रौतहटको आयोजनामा लागुऔषध दुर्व्यसनविरुद्धको अभियानलाई थप सक्रिय बनाइएको छ । यसैक्रममा बुधबार सदरमुकाम गौरमा युवाहरूले जनचेतनामूलक र्याली आयोजना गरेका छन् ।
र्यालीमा ठूलो संख्यामा युवाहरू सहभागी भएका छन् । लागुऔषध दुर्व्यसनविरुद्ध सामाजिक जागरण फैलाउने उद्देश्यले निकालिएको र्यालीमा सहभागी युवाहरूले विभिन्न सन्देशमूलक नारासहित नगरका विभिन्न चोक तथा बजार क्षेत्रमा परिक्रमा गरेका थिए । विशेषगरी विद्यालयमा अध्ययनरत विद्यार्थी र युवा पुस्तालाई लक्षित गरी लागुऔषध सेवनका कारण उत्पन्न हुने शारीरिक, मानसिक, पारिवारिक तथा सामाजिक समस्याबारे जानकारी दिने गरिएको सामाजिक अभियन्ता शैलेन्द्र यादवले बताए ।
यादवका अनुसार रौतहटमा सञ्चालित यो अभियान जेन-जी आन्दोलनपछि मात्रै सुरु भएको भने होइन । यसको सुरुवात करिब चार वर्षअघि नै अभियन्ता यादवको व्यक्तिगत पहलमा भएको थियो । गरुडा नगरपालिका–५ महम्मदपुरबाट सुरु गरिएको उक्त अभियान अहिले जिल्लाका विभिन्न स्थानसम्म विस्तार भएको छ । सुरुवाती चरणमा सीमित स्रोतसाधन र व्यक्तिगत प्रयासबाट अभियान अघि बढाइएको अभियन्ता यादवले बताए । ‘समाजमा लागुऔषध दुर्व्यसनको समस्या बढ्दै गएको र यसको प्रत्यक्ष असर युवा पुस्तामा देखिन थालेपछि स्थानीयस्तरबाटै सचेतना फैलाउने प्रयास थालेको हुँ,’ उनले भने, ‘ग्रामीण भेगका गाउँघरमा पुगेर युवाहरूलाई लागुऔषधको नकारात्मक असरबारे जानकारी गराउने र अभिभावकलाई आफ्ना सन्तानको गतिविधिप्रति सचेत रहन आग्रह गरेको छु ।’
अभियानले स्थानीय समुदायको ध्यान आकर्षित गर्न थालेपछि जिल्लाका अन्य स्थानमा पनि यसको आवश्यकता महसुस हुन थालेको यादवले सुनाए । पछिल्लो समय अभियन्ता यादवकै पहलमा शिवनगर चोक, फतुवा विजयपुर नगरपालिकाका विभिन्न विद्यालय तथा बजार, परोहा नगरपालिका, गौर नगरपालिका, चन्द्रपुर नगरपालिका र गुजरा नगरपालिकालगायत जिल्लाका विभिन्न स्थानमा अभियान सञ्चालन भइरहेको आयोजकले जनायो ।
अभियन्ता यादवका अनुसार लागुऔषध दुर्व्यसन अहिले व्यक्ति विशेषको समस्या मात्र नभई परिवार, समाज र समग्र राष्ट्रकै चुनौतीका रूपमा देखा परेको छ । विशेषगरी किशोरकिशोरी तथा युवाहरू यसको जोखिममा पर्न सक्ने भएकाले समयमै सचेतना फैलाउनु आवश्यक रहेको छ ।
शिव उनी कान्तिपुरका संवाददाता हुन् । रौतहटलाई केन्द्र बनाएर उनले मधेश प्रदेशको राजनीति, सामाजिक र आर्थिक विषयमा रिपोर्टिङ गर्छन् ।
