तस्बिरमा हेर्नुहोस्, एनपीएलको आजको खेलका झलक ।
निकै कसिलो बलिङ गर्दै सुदूरपश्चिम रोयल्सले नेपाल प्रिमियर लिग क्रिकेटमा मंगलबार ‘लो स्कोरिङ’ खेलमा जनकपुर बोल्ट्सलाई २७ रनले पराजित गरेको छ ।
टस जितेर ब्याटिङमा आएको सुदूरपश्चिमले त्रिवि अन्तर्राष्ट्रिय क्रिकेट मैदान कीर्तिपुरमा निर्धारित २० ओभरमा ९ विकेट गुमाई १ सय २० रनमात्र बनाएको थियो । जवाफमा आएको जनकपुर १९.५ ओभरमा ९३ रनमा अलआउट भयो ।
जनकपुरमाथिको जितले सुदूरपश्चिमसँगै काठमान्डु गोर्खाजको पनि प्ले अफ निश्चित भएको छ । दुवै टोलीको समान ८ अंक छ । राम्रो रन रेटमा काठमान्डु शीर्ष स्थानमा छ । सुदूरपश्चिमको यो लगातार तेस्रो विजय हो ।
दुई वर्ष अघिको पहिलो सिजनमा जनकपुरले सुदूरपश्चिमलाई फाइनलमा पराजित गर्दै उपाधि जितेको थियो । तर यस हारपछि जनकपुर बाहिरिने खतरामा पुगेको छ । टोलीको ६ खेलमा ४ अंकमात्र छ र टोलीले १ खेलमात्र खेल्न बाँकी छ ।
अंगद ढकाल विगत एक दशकदेखि फोटोपत्रकारका रुपमा कार्यरत छन् । उनी हाल कान्तिपुर दैनिकसँग आवद्ध छन् ।
