कञ्चनको हात्तीबजारमा पटका पड्काउँदा एक जना घाइते भएपछि प्रहरीले दुई जनालाई तत्काल नियन्त्रणमा लिएको हो। आतिशबाजी गरिरहेका अन्य स्थानबाट पाँच जना पक्राउ परेका छन् ।
बुटवल — रूपन्देहीका विभिन्न स्थानमा तिहारको पटका पड्काउने ७ जनालाई रूपन्देही प्रहरीले नियन्त्रणमा लिएको छ । पटका पड्काउने क्रममा एक जना घाइते भएका छन् ।
रूपन्देही प्रहरीका अनुसार सोमबार बेलुकी पौने ७ बजे कञ्चन गाउँपालिका-१ स्थित हात्तीबजार चोकमा लालीगुँरास युवा क्लबले भैलो खेलिरहेको अवस्थामा पटका पड्काउँदा एक जना घाइते भएका हुन् ।
घटनामा संलग्न आरोपमा कपिलवस्तु बाणगंगा नगरपालिका-२ बस्ने कृष्ण परियार र आर्यन परियारलाई प्रहरीले तत्काल नियन्त्रणमा लिएको छ। घाइतेको हाल उपचार भइरहेको प्रहरीले जनाएको छ। त्यस्तै, जिल्लाका विभिन्न स्थानमा अवैध रूपमा पटका पड्काई आतिशबाजी गरिरहेको अवस्थामा अन्य ५ जनालाई पनि प्रहरीले नियन्त्रणमा लिएको छ।
जिल्ला प्रहरी कार्यालय रुपन्देहीका सूचना अधिकारी प्रहरी नायब उपरीक्षक कृष्णकुमार चन्दले पक्राउ परेकामाथि थप अनुसन्धान भइरहेको जनाए ।
घनश्याम गौतम कान्तिपुरका बुटवल संवाददाता हुन् ।
