टर्कीको अन्ताल्यामा आयोजित सम्मेलनमा नेपालले हिमाली पारिस्थितिक प्रणालीको जोखिम उजागर गर्दै जलवायु परिवर्तनको असर न्यूनीकरणका लागि अन्तर्राष्ट्रिय सहयोग बढाउन आह्वान गरेको छ ।
अन्ताल्या (टर्की) — नेपालले जलवायु परिवर्तनसम्बन्धी संयुक्त राष्ट्रसंघीय महासन्धिका पक्ष राष्ट्रहरूको ३१औं सम्मेलन (कोप–३१) मा सोमबार राष्ट्रिय पेभिलियन उद्घाटन गरेको छ । टर्कीको अन्ताल्यामा आयोजित सम्मेलनमा नेपालले हिमाली पारिस्थितिक प्रणालीको जोखिम उजागर गर्दै जलवायु परिवर्तनको असर न्यूनीकरणका लागि अन्तर्राष्ट्रिय सहयोग बढाउन आह्वान गरेको छ ।
परराष्ट्रमन्त्री शिशिर खनालले नेपाल पेभिलियन उद्घाटन गरेका हुन् । पेभिलियनमा नेपालको जलवायु महत्वाकांक्षा, जैविक विविधता संरक्षणका उपलब्धि र समुदायस्तरमा भइरहेका अनुकूलनका प्रयास प्रदर्शन गरिएका छन् ।
उद्घाटन समारोहलाई सम्बोधन गर्दै मन्त्री खनालले विशेषगरी हिमाली क्षेत्रमा हिउँ र हिमनदीसँग सम्बन्धित जोखिम बढ्दै गएको भन्दै त्यसतर्फ विश्व समुदायको ध्यानाकर्षण गराए ।
हालैको भोटेकोशी विपद्लाई 'हिमालयन सुनामी' को संज्ञा दिँदै उनले नेपालजस्ता जलवायु परिवर्तनको जोखिममा अग्रपंक्तिमा रहेका मुलुकले असमानुपातिक असर भोग्नुपरेको बताए । उनले जलवायु न्याय, हानि तथा नोक्सानी सम्बोधनका लागि सहज वित्तीय पहुँच र हिमाली क्षेत्रको उत्थानशीलता बढाउन अन्तर्राष्ट्रिय साझेदारी सुदृढ गर्नुपर्नेमा जोड दिए । यसले तल्लो तटीय क्षेत्रको सुरक्षामा समेत योगदान पुर्याउने उनको भनाइ थियो ।
समारोहमा स्वास्थ्य तथा खाद्य सुरक्षामन्त्री निशा मेहता, प्रतिनिधिसभा सदस्य सागर ढकाललगायतले पनि सम्बोधन गरेका थिए । नेपाल पेभिलियनले जलवायु परिवर्तनका चुनौती, अनुकूलनका प्रयास र अन्तर्राष्ट्रिय जलवायु वार्तामा नेपालको प्राथमिकता प्रस्तुत गर्ने मञ्चका रूपमा काम गर्ने अपेक्षा गरिएको छ ।
