काठमाण्डौ । तेस्रो संस्करणको नेपाल प्रिमियर लिग (एनपीएल) मा आज कीर्तिपुरमा हुने दुई खेलले प्लेअफको दौडलाई थप रोचक बनाउनेछन् । जितविहीन पोखरा एभेन्जर्सलाई आफ्नो सम्भावना जोगाउन कर्णाली याक्सविरुद्ध जित चाहिएको छ । साँझ चितवन राइनोज र काठमान्डु गोर्खाज भिड्दा दुवै टोलीको लक्ष्य शीर्ष चारमा आफ्नो पकड बलियो बनाउने हुनेछ ।
त्रिवि अन्तर्राष्ट्रिय क्रिकेट मैदानमा कर्णाली र पोखराबीचको खेल दिउँसो १२ः३० बजे सुरु हुनेछ । चितवन र काठमान्डुबीचको दोस्रो खेल साँझ ५ बजे हुनेछ । लिग चरणका १८ खेलपछि लुम्बिनी लायन्स, काठमान्डु गोर्खाज, सुदूरपश्चिम रोयल्स र चितवन राइनोज शीर्ष चारमा छन् । आठै टोलीले सात–सात खेल खेल्ने लिग चरणबाट शीर्ष चार टोली प्लेअफमा पुग्नेछन् ।
चार खेलबाट चार अंक जोडेको कर्णालीले जनकपुर बोल्ट्सलाई १९ रन र विराटनगर किङ्सलाई चार विकेटले हराएको थियो । त्यसपछि काठमान्डुसँग चार विकेट र सुदूरपश्चिमसँग ३९ रनले पराजित भयो । सुदूरपश्चिमले दिएको १७६ रनको लक्ष्य पछ्याउँदा कर्णाली १३७ रनमै रोकिएको थियो । पोखराविरुद्ध जिते कर्णालीको ६ अंक हुनेछ र लुम्बिनी तथा चितवनसँगका बाँकी दुई खेलअघि प्लेअफको दाबेदारी बलियो बन्नेछ ।
पोखराले भने चारै खेल गुमाएको छ । सुदूरपश्चिमसँग ६ विकेट, जनकपुरसँग नौ रन, लुम्बिनीसँग आठ विकेट र चितवनसँग ३० रनले हारेको पोखरा अंकतालिकाको पुछारमा छ । कर्णालीपछि उसले विराटनगर र काठमान्डुसँग खेल्नेछ । तीनै खेल जिते पनि पोखरा अधिकतम ६ अंकमा पुग्नेछ । त्यसैले प्लेअफको सम्भावना आफ्ना तीन जितसँगै अरू टोलीका नतिजामा पनि निर्भर छ ।
पहिलो खेलमा जनकपुरसँग हारेको काठमान्डुले त्यसपछि कर्णाली, विराटनगर र लुम्बिनीलाई लगातार हराएको छ । चार खेलबाट ६ अंक जोडेको काठमान्डुले आज जिते आठ अंक पुर्याउनेछ । त्यसपछि उसले सुदूरपश्चिम र पोखरासँग खेल्न बाँकी रहनेछ ।
चितवनको चार खेलबाट पाँच अंक छ । विराटनगर र पोखरालाई हराएको चितवन सुदूरपश्चिमसँग पराजित भएको थियो । वर्षाका कारण लुम्बिनीसँगको खेल नतिजाविहीन भएपछि दुवै टोलीले एक–एक अंक बाँडेका थिए । आज जिते चितवन सात अंकसहित काठमान्डुलाई उछिन्नेछ । चितवनका बाँकी दुई खेल जनकपुर र कर्णालीसँग छन् ।
अघिल्ला दुई संस्करणमा आज भिड्ने दुवै जोडीले एकअर्काविरुद्ध एक–एक जित बाँडेका छन् । यसपटक दिउँसोको नतिजाले पोखराको बाँकी बाटो र कर्णालीको दाबेदारी तय गर्नेछ भने साँझको खेलले शीर्ष चारभित्रै काठमान्डु र चितवनको स्थानमा असर पार्नेछ ।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।
