नेवारी कला, संस्कृति र परम्पराको संरक्षण तथा नयाँ पुस्तामा हस्तान्तरण गर्ने उद्देश्यले आयोजित र्यालीले धनकुटा बजार परिक्रमा गरेको थियो।
धनकुटा — नेपाल सम्वत् ११४७ को नयाँ वर्षको अवसरमा धनकुटामा सांस्कृतिक झाँकीसहित भिन्तुना र्याली निकालिएको छ। नेवारी कला, संस्कृति र परम्पराको संरक्षण तथा नयाँ पुस्तामा हस्तान्तरण गर्ने उद्देश्यले नेवारी समुदायले र्याली आयोजना गरेको हो।
धनकुटा नगरपालिका-५ तल्लो कोप्चेस्थित कृष्ण कम्पनीबाट सुरु भएको र्यालीले तल्लो तथा माथिल्लो कोप्चे, बालमन्दिर हुँदै धनकुटा बजार परिक्रमा गरेको थियो।
नेपाल संवतको नयाँ वर्ष नेवार समुदायका लागि सांस्कृतिक पहिचान, मौलिक परम्परा र सामाजिक एकताको प्रतीकका रूपमा रहँदै आएको छ। यस अवसरमा निकालिने भिन्तुना र्यालीले पुर्खादेखि चलिआएको संस्कृति, भेषभूषा, कला र बाजागाजाको संरक्षणसँगै समुदायबीचको आत्मीयता र एकतालाई समेत बलियो बनाउने तल्लो कोप्सेका देवेन्द्र प्रधानले बताए ।
धनकुटामा हरेक वर्ष नयाँ संवत्को स्वागतमा नेवारी समुदायले मोटरसाइकल र्याली निकाल्दै आएका छन्। यसले परम्परागत सांस्कृतिक उत्सवलाई आधुनिक पुस्ता र युवासँग जोड्ने माध्यमका रूपमा समेत काम गरेको छ।
मोटरसाइकल र्यालीमार्फत नयाँ वर्षको सन्देश बजार तथा समुदायका विभिन्न क्षेत्रमा पुर्याउनुका साथै उत्सवमा युवाको सहभागिता बढाउने प्रयास गरिएको आयोजक संयोजक शम्भु प्रधानले बताए।
तल्लो कोप्चेले आयोजना गरेको यस वर्षको र्यालीमा सांस्कृतिक झाँकी र मोटरसाइकल र्यालीलाई एकैसाथ समेटिएको थियो। यसले नेपाल सम्वतको ऐतिहासिक तथा सांस्कृतिक महत्त्वसँगै बदलिँदो समयअनुसार उत्सव मनाउने शैलीलाई पनि प्रतिबिम्बित गरेको छ।
विनोद घिमिरे कान्तिपुर संवाददाता हुन्।
