सानास्थित सेहातुना अस्पतालका निर्देशक अब्दुल-अजीज अल-दैलामीका अनुसार धेरै पीडितहरू अझै पनि भग्नावशेषमुनि थिचिएका छन्। उद्धारकर्मीहरू पुग्नासाथ थप आक्रमण भएकाले केही स्वास्थ्यकर्मीको समेत मृत्यु भएको छ
साना — यमनको राजधानी सानानजिकैको एक गाउँमा साउदी अरेबियाले गरेको हवाई आक्रमणमा कम्तीमा ३३ जनाको मृत्यु हुनुका साथै ३९ जना घाइते भएका छन्।
हुथीद्वारा सञ्चालित साबा समाचार एजेन्सीका अनुसार शनिबार आक्रमण भएको थियो । यो आक्रमण गत जुलाईमा साउदी र इरान समर्थित हुथी समूहबीच पुनः लडाइँ सुरु भएयताकै सबैभन्दा घातक मानिएको छ।
साउदी अरेबियाको अन्तर्राष्ट्रिय सञ्चार केन्द्रले भने यस घटनाबारे छानबिन भइरहेको जनाएको छ। हुथी स्वास्थ्य मन्त्रालयका अनुसार सानाको पूर्वमा रहेको हुथीको पकड क्षेत्र बनी हुसैसका घरहरूमा हवाई आक्रमण भएको थियो, जहाँ ज्यान गुमाउनेमा धेरैजसो महिला र बालबालिका रहेका छन्।
सानास्थित सेहातुना अस्पतालका निर्देशक अब्दुल-अजीज अल-दैलामीका अनुसार धेरै पीडितहरू अझै पनि भग्नावशेषमुनि थिचिएका छन्। उद्धारकर्मीहरू पुग्नासाथ थप आक्रमण भएकाले केही स्वास्थ्यकर्मीको समेत मृत्यु भएको छ।
अमेरिका र इरानबीचको फराकिलो द्वन्द्वको असरका रूपमा फैलिएको यो लडाइँले यमनमा १२ वर्ष पुरानो जटिल युद्धलाई पुनः ब्युँताएको छ । यस युद्धका कारण लामो समयदेखि यमन अस्थिर छ र ठूलो जनसंख्या बिस्थापित भइसकेको छ ।
यो नयाँ द्वन्द्वले सन् २०२२ मा संयुक्त राष्ट्रसंघको मध्यस्थतामा भएको युद्धविरामलाई पूर्ण रूपमा तोडिदिएको छ।
