सिंगापुरमा कार्यरत फोटोग्राफरको क्यामेरामा कैद पाटनका जीवन्त सम्पदा, जहाँ शताब्दीयौं पुराना परम्परा र दैनिक जीवनका लय एकाकार हुन्छन् ।
सिंगापुरमा कार्यरत फोटोग्राफर जु शेन लीका तस्बिरले पाटन दरबार क्षेत्रको मनमोहक सौन्दर्य र त्यस वरपरको जीवनलाई कैद गरेका छन् । युनेस्को विश्व सम्पदा सूचीमा सूचीकृत यस क्षेत्र वरपर बसोबास गर्ने र यहाँका मन्दिरमा पूजाआजा गर्ने मानिसहरूको अमूर्त सांस्कृतिक सम्पदालाई उनका तस्बिरले जीवन्त रूपमा प्रस्तुत गरेका छन् ।
प्राकृतिक प्रकाशको मात्र प्रयोग गरेर जु शेनले बिहान झिसमिसेदेखि राति अबेरसम्म तस्बिर खिच्ने गर्छिन् । उनका तस्बिरमा मानिस, जनावर र वास्तुकलाका साथै पाटनको मूलचोकमा प्रस्तुत गरिने अष्टमातृका नृत्यका दृश्यसमेत समेटिएका छन् ।
सहरको जीवन्त धड्कन र त्यसलाई घेरेको सांस्कृतिक सम्पदाका अनेक तहलाई तस्बिरमा उतार्नु उनको रुचि हो ।
यहाँ प्रस्तुत प्रत्येक तस्बिरका लागि जु शेनले दर्जनौं तस्बिर खिचेर छानेकी हुन् । उनी पूर्णताका लागि मेहनत गर्ने फोटोग्राफर हुन्, जसको मन काठमाडौं उपत्यकाजत्तिकै विशाल छ । यही स्वभाव र लगनशीलताको संयोजनले उनका तस्बिरलाई आकर्षक र स्मरणीय बनाएको छ ।
उनी अहिले काठमाडौं भ्याली प्रिजर्भेसन ट्रस्ट (केभीपीटी) — काठमाडौं उपत्यका संरक्षण कोष सँग मिलेर काम गरिरहेकी छन् । पछिल्लो ३५ वर्षदेखि यो संस्थाले नेपली दैनिक जीवन, रीतिरिवाज र परम्परासँग अभिन्न रूपमा जोडिएको मूर्त सांस्कृतिक सम्पदाको पुनर्निर्माण र संरक्षणमार्फत नेपालको अमूर्त सांस्कृतिक सम्पदाको जगेर्ना गर्दै आएको छ ।
केभीपीटीले परम्परागत सीप भएका कालीगढ, इँटा र गारोको प्रयोग गरी सम्पदा संरक्षणको काम गर्छ । यसका साथै भविष्यमा हुने पुनःस्थापना, प्राकृतिक विपद् र अहिले जलवायु परिवर्तनबाट सिर्जना हुन सक्ने जोखिमलाई ध्यानमा राखेर वास्तुकलासम्बन्धी नक्सा, साहित्यिक सामग्री र तस्बिरका रूपमा विस्तृत अभिलेखीकरणसमेत गर्छ ।
यिनै सम्पदालाई भावी पुस्ताका लागि अभिलेखीकरण गर्न जु शेन ली दुई महिनाका लागि काठमाडौं आएकी छन् । उनले काठमाडौं उपत्यका संरक्षण कोषका लागि यी सम्पदाका तस्बिर खिचेकी हुन् ।
जु ली सिंगापुरमा कार्यरत फोटोग्राफर हुन् ।
सोफिया पाण्डे लेखक, कला इतिहासकार तथा चलचित्रकर्मी हुन् । उनी सांस्कृतिक तथा सिर्जनात्मक उद्योगको आर्थिक र सामाजिक सम्भावना, शैक्षिक पहुँच तथा दिगो रणनीतिक योजनाका क्षेत्रमा परामर्श दिन्छिन् । उनले अन्तर्राष्ट्रिय वित्त निगम (आईएफसी) र युनेस्कोका लागि परामर्शदाताका रूपमा काम गरेकी छन् ।उनी काठमाडौं भ्याली प्रिजर्भेसन ट्रस्ट (केभीपीटी) — काठमाडौं उपत्यका संरक्षण कोषकी विकास निर्देशक तथा कलाका लागि गैरनाफामूलक संस्था 'द कला सलोन' की संस्थापक निर्देशक हुन् । यसअघि उनी लामो समयसम्म 'द काठमाडौं पोस्ट' र 'नेपाली टाइम्स' मा स्तम्भकारका रूपमा कार्यरत थिइन् ।
