फाउन्डेसनका सञ्चालक पेम्बा तेञ्जिङ शेर्पाले प्रधानमन्त्री दैवी प्रकोप राहत कोषमा जम्मा गरेको जनाउँदै चेक नमुना गृहमन्त्री सुधन गुरुङलाई हस्तान्तरण गरेका हुन् ।
लमजुङ — शेर्पा फाउन्डेसनले भोटेकोशी बाढीपीडितको राहत तथा पुनःस्थापनाका लागि ४० लाख रुपैयाँ सहयोग गरेको छ ।
फाउन्डेसनका सञ्चालक पेम्बा तेञ्जिङ शेर्पाले प्रधानमन्त्री दैवी प्रकोप राहत कोषमा जम्मा गरेको जनाउँदै चेक नमुना गृहमन्त्री सुधन गुरुङलाई हस्तान्तरण गरेका हुन् । चेक हस्तान्तरण कार्यक्रममा पर्यटन व्यवसायी फुरी शेर्पा, ल्हाक्पा नुरु शेर्पा, कलाकार एन्सर्ज गुरुङ, गण्डकी प्रज्ञा प्रतिष्ठानका सदस्य बालकाशी गुरुङलगायत उपस्थित थिए ।
सन् २०१५ मा अमेरिकाको कोलोराडोमा स्थापना भएको शेर्पा फाउन्डेसनले नेपालमा हुने विभिन्न प्राकृतिक विपद्का बेला राहत तथा पुनःस्थापनाका काम गर्दै आएको छ । २०७२ को भूकम्पपछि फाउन्डेसनले प्रभावित क्षेत्रमा घर पुनर्निर्माण तथा मर्मतसम्भारमा सहयोग गरेको थियो ।
भूकम्पपछि फाउन्डेसनले २३ वटा घर पुनर्निर्माण गर्नुका साथै १ सय ४० भन्दा बढी घर मर्मत तथा पुनःनिर्माणमा सहयोग गरेको थियो । यस्तै, प्रभावित क्षेत्रमा गुम्बा पुनर्निर्माणलगायत सामाजिक कार्यमा समेत आर्थिक सहयोग पुर्याएको फाउन्डेसनले जनाएको छ ।
आश गुरूङ कान्तिपुरका लमजुङ संवाददाता हुन् ।
