नेपाली गीतसंगीत क्षेत्रमा योगदान पुर्याएको भन्दै गायिका भट्टराईलाई इटहरीको राष्ट्रिय जागृति क्लबले स्रष्टा सम्मान प्रदान गरेको हो ।
काठमाडौँ — इटहरीको राष्ट्रिय जागृति क्लबले प्रत्येक वर्ष आयोजना गर्दै आएको स्रष्टा सम्मान यस वर्ष गायिका लोचन भट्टराईलाई प्रदान गरिएको छ । शुक्रबार राति आयोजित नगरस्तरीय लोकनृत्य तथा स्रष्टा सम्मान कार्यक्रममा नेपाली गीतसंगीत क्षेत्रमा योगदान पुर्याएको भन्दै गायिका भट्टराईलाई यस वर्षको स्रष्टा सम्मान प्रदान गरिएको हो ।
कार्यक्रममा उनले आफ्ना चर्चित गीतहरू प्रस्तुत गर्दा दर्शक सांगीतिक धुनमा झुमेका थिए । ‘टाढा टाढा नभई जाऊ तिमी’, ‘माया गर्नेको चोखो माया पनि देखियो’, ‘खोटाङ जिल्ला दिक्तेल बजार’ लगायतका गीतले कार्यक्रमलाई थप आकर्षक बनाएका थिए ।
स्रष्टा सम्मानसँगै क्लबले विभिन्न क्षेत्रमा योगदान पुर्याउने अन्य ६ जनालाई समेत सम्मान गरेको छ । पत्रकारितातर्फ विनय बाह्रकोटी, पर्यटनकर्मीतर्फ तेजबहादुर पुरी, क्रिकेट खेलाडीतर्फ दिवस बिष्ट, शिक्षासेवातर्फ रमेश शाह, संगीतकर्मीतर्फ श्याम सुनुवार र ब्याडमिन्टन खेलाडीतर्फ सबिज्ञा दाहाल सम्मानित भएका हुन् ।
उनीहरूलाई इटहरी उपमहानगरपालिकाकी उपप्रमुख संगीता कुमारी चौधरी, क्लबका संस्थापक अध्यक्ष रामकुमार सुब्बा, अध्यक्ष केशव कार्की तथा कार्यक्रम संयोजक रविन गौतमलगायतले सम्मान गरेका थिए । स्थानीयस्तरमा रहेर आ–आफ्नो क्षेत्रमार्फत समाजमा योगदान पुर्याउने प्रतिभाहरूको पहिचान र प्रोत्साहन गर्ने उद्देश्यले सम्मान गरिएको आयोजकले जनाएको छ ।
अर्जुन अर्जुन कान्तिपुर मिडिया ग्रुपका सुनसरी संवाददाता हुन् ।
