सुर्खेतमा जुवातास खेलिरहेको अवस्थामा १७ जना पक्राउ

राति ११:५० बजे प्राप्त सूचनापछि ४५ सदस्यीय संयुक्त प्रहरी टोलीले घरधनीसहित उनीहरूलाई नियन्त्रणमा लिएको हो।

सुर्खेत — सुर्खेतको वीरेन्द्रनगर नगरपालिका–४ जिरो ड्यामस्थित एक घरमा जुवातास खेलिरहेको अवस्थामा १७ जना पक्राउ परेका छन् । जिल्ला प्रहरी कार्यालय सुर्खेतका अनुसार बिहीबार राति ११ बजेर ५० मिनेटमा प्रशान्त शाहीको घरमा जुवातास खेलिरहेको सूचनाका आधारमा प्रहरीले छापा मारेको थियो ।

कर्णाली प्रदेश प्रहरी कार्यालय, जिल्ला प्रहरी कार्यालय र कर्णाली प्रदेश प्रहरी गणबाट खटिएको ४५ जना प्रहरीको संयुक्त टोलीले घरधनी ३४ वर्षीय प्रशान्त शाहीसहित १७ जनालाई पक्राउ गरेको हो ।

प्रहरीले उनीहरूको साथबाट १ लाख ५ हजार ६ सय ७० रुपैयाँ, २८ बुक तास र लङ्गुरबुर्जा खेलका ६ वटा गोटी बरामद गरेको जनाएको छ । बरामद तासमध्ये २४ बुक नखुलेका र ४ बुक खुलेका छन् ।

पक्राउ पर्नेमा दैलेखका १०, अछामका ३, सुर्खेतका ३ र बर्दियाका १ जना छन् । पक्राउ परेकामाथि थप अनुसन्धान भइरहेको प्रहरीले जनाएको छ ।

ज्योति कटुवाल कान्तिपुरकी सुर्खेत संवाददाता हुन् ।