खाँदबारीस्थित महेन्द्र माध्यमिक विद्यालयको खेलमैदानमा शुक्रबार सम्पन्न फाइनल खेलमा जित निकाल्दै सेकाहाले उपाधिसहित ५ लाख रुपैयाँ पुरस्कार हात पारेको हो ।
संखुवासभा — सुनसरीको न्यू स्टार क्लबलाई २–१ गोल अन्तरले पराजित गर्दै संखुवासभाको सेकाहा सामुदायिक क्लबले संखुवासभा गोल्डकप फुटबल प्रतियोगिताको उपाधि जितेको छ । खाँदबारीस्थित महेन्द्र माध्यमिक विद्यालयको खेलमैदानमा शुक्रबार सम्पन्न फाइनलमा जित निकाल्दै सेकाहाले उपाधिसहित ५ लाख रुपैयाँ पुरस्कार हात पारेको हो ।
खेलमा सेकाहाका मिलन लिम्बुले पहिलो हाफको ४५औँ मिनेटमा गोल गर्दै टोलीलाई अग्रता दिलाएका थिए । दोस्रो हाफमा पनि आक्रामक खेल प्रदर्शन गरेको सेकाहाका लागि मिलनले नै ५०औँ मिनेटमा व्यक्तिगत दोस्रो गोल थप्दै अग्रता दोब्बर बनाए ।
२ गोलले पछि परेको न्यू स्टारले खेलमा फर्कने प्रयास गर्दै दबाब सिर्जना गरेको थियो । सोही क्रममा सेकाहाका खेलाडीले पेनाल्टी क्षेत्रभित्र फल गरेपछि न्यू स्टारले पेनाल्टी अवसर पाएको थियो । उक्त अवसरलाई सदुपयोग गर्दै सन्दीप श्रेष्ठले ६०औँ मिनेटमा गोल गरेपछि खेल २–१ को अवस्थामा पुगेको थियो ।
उपविजेता न्यू स्टार क्लबले ३ लाख रुपैयाँमा चित्त बुझाएको छ । विजेता तथा उपविजेता टोलीलाई कोशी प्रदेशका मुख्यमन्त्री हिक्मतकुमार कार्कीले पुरस्कार वितरण गरेका थिए ।
प्रतियोगितामा सेकाहाका दोर्जे तामाङ उत्कृष्ट खेलाडी घोषित भए । त्यस्तै, सेकाहाकै गोलरक्षक विपुल मगर उत्कृष्ट गोलरक्षक तथा न्यू स्टारका सञ्जय श्रेष्ठ उत्कृष्ट डिफेन्डर घोषित भए ।
अरुण उपत्यका सामुदायिक विकास क्लबको आयोजनामा सम्पन्न प्रतियोगितामा विभिन्न जिल्लाका ८ टोलीको सहभागिता रहेको थियो ।
