टीयू क्रिकेट मैदानमा टस हारेर पहिले ब्याटिङका लागि ओर्लेको चितवनले २० ओभरमा ६ विकेट गुमाएर १ सय ५१ रन बनाएको हो ।
काठमाडौँ — चितवन राइनोजले नेपाल प्रिमियर लिग (एनपीएल) तेस्रो सिजनमा शुक्रबार पोखरा एभेन्जर्ससामु १ सय ५२ रनको चुनौतीपूर्ण लक्ष्य प्रस्तुत गरेको छ । टीयू क्रिकेट मैदानमा टस हारेर पहिले ब्याटिङका लागि ओर्लेको चितवनले २० ओभरमा ६ विकेट गुमाएर १ सय ५१ रन बनाएको हो ।
कप्तान सिकन्दर राजा र रवि बोपाराले पाँचौं विकेटका लागि ६० रनको साझेदारी गरे । राजाले १६ बलमा ३७ बनाए भने बोपाराले २८ बलमा ३५ रन जोडे । राजाले दुई चौका र चार छक्का प्रहार गरे । यस्तै बोपाराको ब्याटबाट तीन चौका र दुई छक्का निस्केको थियो ।
यसअघि अर्जुन साउदले डाविड मालनसँग पहिलो विकेटका लागि ६० रनको साझेदारी गरे । तर उनीहरू लगातार आउट भए । अर्जुनले २७ बलमा ३१ रन र मालनले २८ बलमा २८ रन बनाए । डान मोस्ली पनि दुई रन मात्र बनाएर सस्तोमै आउट भए ।
कुशल मल्लको ब्याटबाट ११ रन मात्र सम्भव भयो । दुवै टिमका लागि यस खेलमा जित आवश्यक छ । चितवन तीन अंकमा रहेको छ भने पोखराले अहिलेसम्म अंकको खाता खोल्न सकेको छैन् । पोखरा लगातार तीन खेलमा पराजित रहेको छ ।
