ई-एमआईएसमा व्यापक मात्रामा विवरण दोहोरिएको भन्दै शिक्षा मन्त्रालयले मन्त्रीस्तरीय निर्णयबाट छानबिन समिति गठन गरेको हो ।
काठमाडौँ — विद्यालय शिक्षाको एकीकृत शैक्षिक व्यवस्थापन सूचना प्रणाली (ई-एमआईएस) मा धेरै विद्यार्थीको विवरण दोहोरिएको देखिएपछि शिक्षा तथा खेलकुद मन्त्रालयले छानबिन समिति बनाएको छ ।
सत्य-तथ्य अध्ययन गरी दोषीमाथि कारबाहीको सिफारिस गर्न बिहीबार मन्त्रीस्तरीय निर्णयबाट पाँच सदस्यीय अध्ययन तथा अनुगमन समिति गठन गरिएको हो । मन्त्रालयको खेलकुद तथा विद्यालय शिक्षा महाशाखाका सहसचिव शिवकुमार सापकोटाको संयोजकत्वमा गठित समितिमा शिक्षा विभागका निर्देशक भक्तबहादुर गोदार, मन्त्रालयका कम्प्युटर इन्जिनियर विनोद न्यौपाने र कानुन अधिकृत निकिता दाहाल सदस्य रहेका छन् भने विद्यालय शिक्षा शाखाका उपसचिव शिवप्रसाद रेग्मीलाई सदस्यसचिवको जिम्मेवारी दिइएको छ ।
अनौपचारिक अध्ययनअनुसार ई–एमआईएस प्रणालीमा दुई लाखभन्दा बढी विद्यार्थीका विवरण दोहोरिएका मन्त्रालयले जनाएको छ । प्रणालीमा देखिएको दोहोरो प्रविष्टिका आधारमा राज्यकोषबाट निकासा हुने अनुदान, छात्रवृत्ति, दिवा खाजा, पोसाक, पाठ्यपुस्तक तथा अन्य सेवासुविधाको दुरुपयोग भएको हुन सक्ने भन्दै मन्त्रालयले छानबिन अघि बढाएको शिक्षा तथा खेलकुद सस्मित पोखरेलले बताएका छन् ।
समितिले ई–एमआईएस प्रणालीमा ठूलो संख्यामा विवरण दोहोरिनुको कारण विस्तृत अध्ययन गर्नेछ ।
